Aprelin 12-də ölkə başçısı Bakı bulvarında yerləşən Hərbi Qənimətlər Parkının açılışını etdi. Bu gündən etibarən isə Park ziyarətçilərin gəlişi üçün tam hazırdır.
İkinci Qarabağ savaşında qalib tərəf olan Azərbaycan ordusunun ələ keçirdiyi hərbi qənimətlərin nümayiş olunduğu bu sərgi insanlarda təbii olaraq maraq doğurub. Lakin hər kəsdə qürur hissi oyadan qalibiyyət sevincinin yenidən yaşanması ilə yanaşı, düşmən obrazının necə təqdim olunması ilə bağlı fikir müxtəlifliyi var. Çox sayda erməni əsgər və zabitlərinin eybəcərləşdirilmiş mum fiqurları, boş qalmış dəbilqələrin nümayişi kimi bəzi məqamlar cəmiyyətdə birmənalı qarşılanmayıb.
Ümumiyyətlə Azərbaycan Hərbi Qənimətlər Parkının yaradılması və müharibəyə aid qənimətlərin nümayiş etdirilməsi ilə Ermənistana və dünyaya hansı mesajı ötürür?
“Azərbaycan ilk növbədə çalışır ki, bu müharibədə hansı texnikaların istifadə olunduğunu göstərsin”. Bunu Eurasia Diary-yə konfliktoloq Əvəz Həsənov deyib.
“Qalib dövlət qarşı tərəfin hansı dağıdıcı texnikadan istifadə etdiyini, hansı texniki imkanlara malik olduğunu göstərmək istəyir. Eyni zamanda təbii ki, Azərbaycan öz qələbəsinin miqyasını da göstərmək istəyir. Gələcəkdə ola bilsin ki, ermənilərin quraşdırdıqları hərbi istehkamların maketi və yaxud video və ya hansısa formatda təqdimatı olacaqsa onda görünəcək ki, burada hərbi texnikadan əlavə çox güclü hərbi istehkamlar da olub. Əsas məqsəd dünyaya müharibənin reallığını, miqyasını, eyni zamanda, Ermənistanın işğal altındakı əraziləri geri qaytarmamaq üçün hansı hərbi manevrlərdən və texnikadan istifadə etməsini göstərməkdir”, o bildirib.
Bəs görəsən dünya təcrübəsində bu cür sərgilərə çoxmu rast gəlinir? Ekspertin sözlərinə görə, bütün qanlı münaqişələrin tarix muzeyi var: “Kütləvi qırğın və kütləvi dağıntılardan tutmuş bütün müharibə dövrlərini əhatə edən muzeylər var. Məsələn, Holokost muzeyində yəhudilərin qırğını ilə bağlı bütün tarixi proseslər, şəkillərdən, müxtəlif alətlərdən tutmuş artifaktlara və şəxsi əşyalara kimi video və s. formatda müxtəlif dillərdə izah təqdim olunub. Qırğınlarla bağlı, həmçinin Kolumbiyada, Yuqoslaviyada və s. belə sərgilər var. Bizimkilər də bu təcrübəni öyrəniblər".
Sərgidə erməni hərbçilərinin mum fiqurlarının nümayiş olunması ilə bağlı ekspert bildirib ki, hərbi qənimətlərin sırasında hər şey ola bilər: "O zaman Hitler Almaniyası üzərində qələbədən sonra Sovet hökuməti hərbi qənimət kimi götürülən bütün kaskaları eksponat olaraq muzeylərə bağışlayırdılar. Düşmənin, qalib gəldiyin əsgərin obrazının mum fiquru şəklində göstərilməsindən təbii ki, dərhal ölkəyə qarşı istifadə etməyə çalışacaqlar. Və artıq istifadə edirlər. Xüsusilə, nəzərə alsaq ki, bizim həm Bakıda, həm Dağlıq Qarabağda yaşayan erməni vətəndaşlarımız var. Və onlar bundan istifadə edərək tədbirlərdə bütün beynəlxalq təşkilatlara deyəcəklər ki, baxın, Azərbaycan erməni əsilli obrazını belə təqdim edir. Erməni tərəfi fiqurların nümayişini Azərbaycan tərəfinin düşmənçiliyi dərinləşdirməsi kimi yozur. İrad budur. Azərbaycan isə erməni obrazını deyil, ümumiləşdirilmiş əli silahlı düşmən obrazını yaradıb”.
Gülnar Səlimova
