Ermənistanın birinci prezidenti Levon Ter-Petrosyan və keçmişdə eyni düşərgədə olduğu baş nazir Nikol Paşinyan arasında maraqlı ritorika yaşanır. Rəqabətdən yaranan vəziyyət tərəfləri düşmənçilik həddinə çatdırıb.
Paşinyan parlamentdəki çıxışında özünümüdafiəyə xidmət edəcək bütün kartları açmağa hazır idi və açdı da. O, 2018-ci ildə Ter-Petrosyanla görüşləri zamanı eks-prezidentin ona “Torpaqları artıq Azərbaycana qaytarmalısan” sözlərini deməsini açıqlayıb. Növbədənkənar seçkilərə qatılacaq Ter-Petrosyanın Paşinyana cavabı gecikmədi. O, baş nazirə özünün sözçüsü Arman Musinyanın diliylə “milləti məhv edən bəlalı adamın ruhu çırpıntıları haqda danışmağı mənasız hesab edirəm” cavabını qaytarıb. Bundan əvvəl də Ter-Petrosyan “Paşinyan Ermənistanı bəlaya düçar etdi” demişdi.
Ermənistanda növbədənkənar parlament seçkiləri öncəsi Paşinyanla Ter-Petrosyanın açıq qarşıdurmaya getdiyini söyləmək olarmı?
Bununla bağlı politoloq Fikrət Sadıqov Eurasia Diary-yə açıqlama verib.
Politoloqun sözlərinə görə, vaxtilə Paşinyanla Ter-Petrosyan arasında münasibətlər çox yüksək səviyyədə olub: “Bir çox məsələlərlə bağlı onların mövqeyi üst-üstə düşürdü. Sadəcə olaraq, hər ikisi Qarabağ klanına qarşı çıxış edirdilər. Və bu da onların bu işbirliyini digər siyasi qüvvələrdən müəyyən dərəcədə fərqləndirirdi. Hal-hazırda Paşinyan görünür, vəziyyəti nəzərə alaraq həm öz rəqiblərinə, həm də keçmiş tərəfdaşlarına qarşı sərt ifadələr işlədir. Çünki seçkiqabağı kampaniyası dövründə ona çox yüksək reytinq lazımdır. Bu istiqamətdə Paşinyan bu cür addımlarla bütün üsullara əl atıb”.
Bu iki siyasətçidən hansının baş nazir seçilməsi Azərbaycan üçün əlverişli ola bilər sualına cavabında F. Sadıqov bildirib ki, Ter-Petrosyanın hakimiyyətə gəlməsi daha önəmli olardı: “Düzdür, Ter-Petrosyan da millətçi ideyalarla hakimiyyətə gələn siyasətçidir, amma onun bir sıra məsələlərə yanaşması daha yumşaqdır və radikal deyil”.
Lakin ekspert Ter-Petrosyanın təkbaşına, hətta parlamentə seçilməsinə böyük şübhə ilə yanaşır: “Ola bilsin ki, o, hansısa bir siyasi qüvvə ilə alyans yaratsa, bəlkə də parlamentə seçilə bilər, amma baş nazir olması böyük sual altındadır. Düşünmürəm ki, belə asanlıqla birinci prezident Ter-Petrosyan parlamentə seçilərək çoxluq qazansın və səs çoxluğu ilə baş nazir olsun”.
Gülnar Səlimova
