Şarl Mişelin Qarabağla bağlı mövqeyi beynəlxalq təşkilatların qərarlarına ziddir.  Bunu EDNews.net-ə tanınmış politoloq Qabil Hüseynli Avropa İttifaqı Şurasının Prezidenti Şarl Mişelin yazığı tviti şərh edərkən bildirib.

Qeyd etmək lazımdır ki, avqustun  8-də Avropa İttifaqı Şurasının Prezidenti Şarl Mişel və Rusiya Prezidenti Vladimir Putin arasında telefon danışığı baş tutub. Telefon danışığında hər iki lider Ukrayna,  Belarus və Qarabağ daxil olmaqla bir sıra regional məsələləri müzakirə ediblər.

Bundan sonra Şarl Mişel Prezident Vladimir Putinlə müzakirə etdiyi məsələlərlə bağlı tvit paylaşıb.

Şarl Mişel tvitində telefon danışığında Rusiya Prezidentinə Avropa İttifaqının Ukraynanın və Gürcüstanın ərazi bütövlüyünü dəstəklədiyini çatdırdığını bildirib. Qarabağ məsələsinə gəlincə isə şuranın prezidenti Vladimir Putin ilə Ermənistan -Azərbaycan münaqişəsinin həlli ilə bağlı fikir mübadiləsi apardığını qeyd edib.

Tvitdə Mişelin Ukrayna və Gürcüstanın ərazi bütövlüyünü dəstəklədiyi halda, Azərbaycanın ərazi bütövlüyü ilə bağlı bu cümləni işlətmədiyi diqqəti çəkir. Avropa İttifaqını regionda sülh proseslərinə qatmağa çalışan Şarl Mişel tvitinin ilk cümləsində Ukrayna, Gürcüstan ilə bərabər Azərbaycanın da adını çəkməməsi ikili standart və fərqli yanaşmanın təzahürüdür.

Məsələyə münasibət bildirən politoloq Qabil Hüseynli Belçikada doğulan və Fransanın Avropada “sözçüsü” hesab edilən Şarl Mişelin Qarabağla bağlı mövqeyinin Fransanın Cənubi Qafqazdakı maraqlarına xidmət etdiyini bildirib. Politoloq hesab edir ki, Mişel Fransanın Qarabağla bağlı qərəzli mövqeyini Avropa İttifaqının xarici siyasətində yürütmək istəyir.

“Avropa İttifaqının institutları tərəfindən Azərbaycanın ərazi bütövlüyünü dəstəkləyən bəyanatlar yayımlanıb. Lakin Avropa İttifaqını təmsil edən milliyətçə fransız olan Şarl Mişelin mövqeyi ittifaqın bu qaydalarını pozur. Mişelin Qarabağla bağlı mövqeyi Fransa Prezidenti Emmanuel Makronun mövqeyinə daha yaxındır. Hər iki şəxs ölkəmizə qarşı qərəzli münasibətlər nümayiş etdirirlər. Mişel açıq şəkildə Fransanın Cənubi Qafqazda maraqlarına xidmət etməyə çalışır”, - deyə Hüseynli bildirib.

Qabil Hüseynli beynəlxalq təşkilatların Azərbaycanın suverenliyini və ərazi bütövlüyünü dəstəkləyən bəyanatlar qəbul etdiyini və Avropa İttifaqı liderlərinin təşkilatların qərarlarına hörmət etməsinin vacibliyini vurğulayıb.

“Avropa Parlamenti NATO-nun Parlament Assambleyası və ATƏT-nin Parlament Assambleyası Azərbaycanın ərazi bütövlüyünün tanınması ilə bağlı rəsmi bəyanatlar qəbul ediblər. Bu bəyanatlara hamı hörmət etməldir. Lakin Şarl Mişel və onun kimi siyasi liderlər bu bəyanatlara məhəl qoymayaraq provokativ addımlar atmağa çalışırlar. Onların provokativ addımları regionda sülhə yox, vəziyyətin gərginləşdirilməsinə xidmət edir. Şarl Mişel bu cür ikili mövqe sərgiləməklə xətaya yol verir. Bu xəta isə ittifaqının nüfuzuna xələl gətirir”, - deyə politoloq qeyd edib.

“Avropa İttifaqı liderləri ölkəmizə qarşı ikili standartlı siyasətini dayandırmalıdırlar. BMT-nin Azərbaycanla bağlı qətnamələrinə və qərarlarına hörmət etməlidirlər. Mişelin mövqeyinə gəlincə isə bu ölkəmizin rəhbərliyi tərəfindən kəskin şəkildə pislənilməlidir”, - deyə o tamamlayıb.

Yunis Abdullayev

Məqalə Azərbaycan Respublikası Medianın İnkişafı Agentliyinin maliyyə dəstəyi ilə hazırlanmışdır

6.3.4. ictimai və dövlət maraqlarının müdafiəsi;