Xəbər verdiyimiz kimi, Gürcüstan tərəfi öncədən xəbərdarlıq etmədən İran vətəndaşlarının ölkəyə girişini qadağan edib. Bu qərara o cümlədən Gürcüstana giriş üçün daimi vizası olanlara da şamil edilib.
Gürcüstan tərəfinin bu addımı İran tərəfinin ciddi reaksiyasına səbəb olub. Belə ki, iranlı vətəndaşların sərhəddə yaşadığı problemlərə biganə qalmadığını göstərən İran Xarici İşlər Nazirliyi və bu barədə bəyanat verən nazirliyin sözçüsü Səid Xatibzadə gürcü sərhədçilərinin İran vətəndaşlarına qarşı davranışlarını qəbuledilməz adlandırıb. Nazirlik həmçinin, Gürcüstan tərəfini bu addımla iranlılara qarşı diskriminasiyada ittiham edib. Xətibzadə həmçinin, İranın Tiflisdəki səfirliyinin bu problemi yaxından izlədiyini və Gürcüstanın Tehrandakı səfirliyinə məlumat verildiyini deyib.
Rəsmi Tiflisin bu addımı siyasi dairələrdə ciddi sual yaradıb. O cümlədən son günlər İranla münasibəti nisbətən gərgin olan Azərbaycanda da bu qərar müxtəlif cür yozulub.
Baş verənlərin detallı səbəbləri ilə bağlı Gürcüstanda fəaliyyət göstərən “Geokeys” beyin mərkəzinin rəhbəri, hüquqşünas Viktor Kipiani EDNews.net-ə açıqlama verib.
Kipiani ilk öncə bildirib ki, İranla Gürcüstan arasında siyasi müstəvidə heç bir gərginlikdən söz gedə bilməz: “Bizim İran dövləti ilə bütün sahələrdə əlaqələrimiz yaxşı vəziyyətdədir və biz hər zaman İranla ticarət sahəsində əməkdaşlıq etmişik. Hesab edirəm ki, burada baş verənləri iki ölkə arasında münasibətlərin gərginləşməsi kimi qələmə vermək düzgün deyil”.
Hüquqşünas iranlıların sərhəddən buraxılmaması ilə bağlı əsl səbəblərə də aydınlıq gətirib.
“Mənim ofisim hazırda bir neçə iranlı vətəndaşlara xidmətlər göstərir. Lakin onlar ayrı-seçkiliklə bağlı bir problem yaşamadıqlarını deyirlər. İran vətəndaşlarının buraxılmaması ilə bağlı əldə etdiyim məlumatı qeyd etmək istərdim. Bilirsiniz ki, hazırda ölkədə pandemiya ilə bağlı giriş-çıxışa nəzarət gücləndirilib. Bundan əlavə, hazırda ölkəyə nəinki çox sayda İran vətəndaşı, hətta digər ölkələrin vətəndaşları gəlir. Əlbəttə kimliyindən asılı olmayaraq pandemiya şəraitində sərhəddə müəyyən məhdudiyyətlər tətbiq edilə bilir. Bunun digər səbəbi təhlükəsizliklə də bağlıdır”.
Kipiani baş verənlərə İranın göstərdiyi reaksiyaya da toxunub: “Sərhədlə bağlı problemə gəlincə, hesab edirəm ki, bu məsələnin bu qədər ciddiləşdirməyə lüzum yoxdur. Təbii ki, İran XİN-nin sözçüsü cənab Səid Xətibzadənin yaranan sərhəd problemi ilə bağlı açıqlaması olub və bundan rəsmi dairələrin də xəbəri var. Lakin onu qeyd etməliyəm ki, İran XİN-i belə ritorik bəyanatla məsələnin səbəblərini araşdırmadan məntiqi yanaşmadan çox kənara çıxıb”.
Elnur Ənvəroğlu
