Azərbaycanla Ermənistanın dövlət başçıları arasında Brüssel görüşü keçirilməyə bilər - Ekspert - ednews.net

26 Yanvar, Çərşənbə

Azərbaycanla Ermənistanın dövlət başçıları arasında Brüssel görüşü keçirilməyə bilər - Ekspert

Analitika A- A A+

Məlum olduğu kimi, 2-3 dekabr tarixlərində Stokholm şəhərində ATƏT-in Nazirlər Şurasının 28-ci iclası keçirildi və Azərbaycan xarici işlər naziri bu iclasda iştirak etdi. Fürsətdən istifadə edərək, Minsk Qrupunun həmsədrləri Azərbaycan və Ermənistan xarici işlər nazirlərinin növbəti görüşünün Stokholmda keçirilməsi təklifi ilə çıxış etdilər. Lakin, Azərbaycan Respublikası Xarici İşlər Nazirliyinin Mətbuat xidməti İdarəsinin rəisi Leyla Abdullayevanın verdiyi məlumata əsasən 3 dekabr tarixində nəzərdə tutulan görüşdən bir neçə saat öncə Ermənistan tərəfinin təxribatı baş verdi. Belə ki, Ermənistan parlamentarilərının Azərbaycan Respublikası ərazilərinə qanunsuz səfər etməsi ilə bağlı məlumat yayıldı. Beləliklə də Azərbaycan tərəfi Ermənistanın bu təxribatına cavab olaraq, Stokholmda iki ölkə nazirinin görüşünün keçirilməsini məqsədəuyğun hesab etmədi və Ermənistan parlamentarilərin bu hərəkətini ikitərəfli münasibətlərin normallaşdırılmasına qarşı yönəlmiş hərbi-siyasi təxribat kimi qiymətləndirdi.

Diqqətlə nəzərdən keçirdikdə Azərbaycan ərazisinə qanunsuz səfər edən deputatların Ermənistanın keçmiş prezidenti, Azərbaycan xalqının cəlladı Robert Koçaryanın rəhbərlik etdiyi “Ermənistan” parlament fraksiyasının üzvləri olduğunu görmək mümkündür. Azərbaycanla Ermənistan arasında münasibətlərin normallaşdırılması, ən yüksək səviyyədə ikitərəfli görüşün tarixinin artıq məlum olduğu bir vaxtda bu addımın atılmasını görüşlərin keçirilməsinə qarşı yönələn pozucu addım kimi qiymətləndirmək mümkündür. Deməli, Rusiya və Avropa strukturlarının ciddi səylərinə baxmayaraq Ermənistan daxilində iki ölkə arasında münasibətlərin yaxınlaşdırılmasına qarşı olan qüvvələr fəaliyyətə keçiblər və onlar ilk “nailiyyətlərini” qazandılar: - Azərbaycan Respublikası Xarici İşlər naziri Ceyhun Bayramovla Ermənistan Xarici İşlər naziri Ararat Mirzoyanın Stokholmda dekabrın 3-nə nəzərdə tutulan görüşü baş tutmadı.

Azərbaycanla Ermənistan arasında Rusiyanın vasitəçiliyi ilə üçtərəfli görüş iki dövlət başçısının Belçikanın paytaxtı Brüsseldə görüşəcəkləri haqqında məlumat yayıldıqdan sonra - 26 noyabrda Moskvanın Ermənistan Baş naziri Nikol Paşinyana ciddi təzyiqindən sonra Soçidə baş tutdu. Vladimir Putin və Rusiya hakim dairələri Nikol Paşinyanın Avropanı Rusiyadan üstün tutaraq Brüsseldə görüşmək istəməsini birmənalı qarşılamadı. Rusiyada onun bu addımını Rusiyaya qarşı xəyanətlər silsiləsinin davamı kimi qiymətləndirdilər.

Soçidə keçirilən üçtərəfli görüşdə Rusiya Paşinyanla nəzərdə tutulan məsələlərin həllində gözlədiyi nəticəni ala bilmədi. Paşinyan Soçiyə məcburiyyət qarşısında qalaraq getmişdi və ondan ciddi addımlar gözləmək sədəlövhlük olardı. O həlledici məsələləri Brüsseldə müzakirə etmək və razılığa gəlmək üçün saxlayırdı. Bu isə indiki şəraitdə, Rusiya ilə Avropa Birliyi arasında müxtəlif sahələr üzrə qarşıdurmanın ən yüksək həddə olduğu bir vaxtda Rusiya tərəfindən heç qəbuledilən deyil.

Yaranan situasiyanı Ermənistanda Paşinyana müxalif olan qüvvələr Robert Koçaryan, Serj Sarqsyan və başqaları yerində dəyərləndirərək, həm də Moskvadan alınan siqnallar əsasında fəaliyyətə keçdilər. Onların ilk addımı iki ölkə xarici işlər nazirlərinin Stokholmda keçirilməsi nəzərdə tutulan görüşə qarşı oldu. Onlar bu vəzifənin qarşısında “uğurla” gəldilər. “Ermənistan” parlament fraksiyasının deputalarının qanunsuz olaraq Azərbaycan ərazisinə səfəri xarici işlər nazirlərinin görüşünün keçirilməsinin qarşısını aldı.

Bu “müvəffəqiyyətdən“ ruhlanan Qarabağ erməni klanı növbəti addımlarını həyata keçirməyə başlayıblar. Onlar bu dəfə İlham Əliyevlə Nikol Paşinyan arasında delabrın 15-nə Brüsseldə keçirilməsi nəzərdə tutulan görüşün qarşısını almaq üçün fəaliyyətə keçiblər. Bunun üçün iki ölkə arasındakı sərhəddə genişmiqyaslı təxribatdan tutmuş Rusiya sülhməramlıəlarının nəzarəti altında olan ərazilərdən Azərbaycan əsgərləriunə qarşı hücuma qədər müxtəlif hərəkətlər müzakirə olunur.

Maraqlı burasıdır ki, Rusiya tərəfi Ermənistanda olan öz proksilərinin təxribat xarakterli hücumlarının qarşısını almaq üçün tədbirlər görmür və ya onları yerində oturtmur. Görünən budur ki, Brüsseldə nəzərdə tutulmuş yüksək səviyyəli görüşün baş tutması və bu görüşdə Soçidə əldə olunmuş razılaşmadan artıq hər hansı sənədin imzalanması Rusiyanın maraqlarına cavab vermir. Rusiyada bunu Avropa ilə qarşıdurmada uduzmaq kimi qiymətləndirirlər.

Azərbaycanla Ermənistan arasındakı münasibətlərin Avropa-Rusiya qarşıdurmasında mərkəzi yer tutması heç kimə sirr deyil. Bu qarşıdurmanın nə ilə nəticələnəcəyi hələlik məlum olmasa da Brüssel görüşləri müəyyən proqnozlar verməyə imkan verəcək.

Azərbaycan Ordusu, sərhədçilərimiz və müvafiq qurumlar ermənilər tərəfindən Brüsseldə keçiriləcək ikitərəfli görüşü pozmağa yönələn növbəti genişmiqyaslı təxribatın ola biləcəyini nəzərdə tutaraq sayıqlığı daha da artırmalıdırlar.

Əlimusa İbrahimov

EDNews.net

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...