Bakıda şənbə və bazar günü sərt karantin rejiminin tətbiqi marketlərdə çörək qıtlığı və alıcı sıxlığına səbəb olub. Hətta marketlərdən bildirilir ki, istehsal zavodlarından gün ərzində 3 dəfədən çox çörək gətirilsə də təlabatı ödəyə bilməyiblər. Bununla bağlı iqtisadçı ekspert Natiq Cəfərli “EDNews.net”ə açıqlama verib.

N.Cəfərli qeyd edib ki, əslində, dünən və sırağagün marketlərdə baş verən vəziyyət qaydaların tətbiqində olan problemlərlə bağlıdır: “İnsanları iki gün, 48 saat evdə oturmağa çağıran və buna qərar verən hökumət ərzaq mağazalarının və apteklərin işləməsinə icazə verməli idi. Məhəllə marketlərində hər kəs sərbəst şəkildə çörəyini və ərzağını ala bilərdi. Ən azından mağazalar səhər saat 09:00-dan günorta saat 14:00-15:00-a kimi işləməliydi. Bu zaman nə belə ajiotaj ola bilərdi, nə də görünən mənzərələr qarşımıza çıxardı. Deməli, əhalinin davranış qaydalarına təsir göstərən düşünülməmiş qərarlar daha çox oldu”.

İqtisadçının sözlərinə görə, Azərbaycanda ciddi problemlərdən biri də ərzaq təhlükəsizliyi məsələsidir.

“Bu gün biz yerli məhsullarla öz tələbatımızın ən yaxşı halda yarısını ödəyə bilirik, digər məhsullar isə xaricdən gətirilir. Hətta Azərbaycan bazarında ən çox yerli məhsul adı altında satılan məhsulların xammalı da xaricdən gətirilir. Məsələn bazarda ən çox gördüyümüz çay məhsulları müxtəlif markalarla Azərbaycan çayı adı ilə satışa çıxarılır, amma Azərbaycanda bu qədər çay kolu da yoxdur. Hamı da bunu bilir. Bu məhsullar Hindistandan, Şri-Lankadan gətirilib Azərbaycanda qablaşdırılır. Düyü və şəkər tozu, hətta süd məhsullarında da belədir. Azərbaycanda bazarlarda çoxluq təşkil edən süd məhsullarının xammalı olan süd tozu əsasən Ukraynadan, Rusiyadan və bəzi Avropa ölkələrindən, eləcə də, əvvəl İrandan gətirilirdi, deyə iqtisadçı son zamanlar İrandan idxalın azaldığını qeyd edib.

N.Cəfərli bildirib ki, ərzaq təhlükəsizliyi məsələsinin həlli üçün yerli istehsalın genişləndirilməsinə çox ehtiyac var: “Amma nə qədər çalışsaq da, biz ərzaq təhlükəsizliyini 100 faiz özümüz təmin edə bilmirik. Yəni, bu mümkün də deyil, dünyada belə bir ölkə də yoxdur. Ərzaq təhlükəsizliyi məsələsinə həm də azad ticarət məsələsi aiddir. Yəni insanlar nə qədər rəqabətli şəkildə ticarət münasibətləri yarada bilsələr bu ərzaq təhlükəsizliyinə pozitiv təsir edən amilə çevrilə bilər”, o deyib.

Gülnar Səlimova

EDNews.net