Azərbaycan bəzi ölkələrdən quş ətinin idxalına məhdudiyyət qoyub. Azərbaycan Qida açıqlamasında qeyd edib ki, Ümumdünya Heyvan Sağlamlığı Təşkilatının rəsmi məlumatlarına əsasən, İtaliyanın Toskana, Seneqalın Louqa, Çilinin Maule, Valparaiso, Bio-Bio regionlarında, Argentinanın Kordova, Santa-Fe əyalətlərində və Bolqarıstanın Veliko-Tarnovo vilayətində yüksək patogen quş qripi xəstəliyi qeydə alınıb.
Bu Azərbaycanda quş ətinin qiymətlərinə hansı təsirini göstərə bilər?
Mövzu ilə bağlı İqtisadi və Sosial Araşdırmalara Yardım İctimai Birliyinin sədri Eyyub Kərimli Ednews-a bildirib ki, bu məhdudiyyət daxili bazara və qiymətlərə təsir etməyəcək.
“Çünki həmin ölkələrdən bizə çox az miqdarda və ya ümumiyyətlə quş əti idxal edilmir. Bizim ölkəyə, əsasən, Ukrayna, Braziliya, Belarusiya, Rusiya və Türkiyədən quş əti idxal edilir. Bu ölkələrdən idxala heç bir məhdudiyyət yoxdur. Rusiya-Ukrayna mühribəsinə baxmayaraq, quş ətini ölkəmizə idxalı davam edir”.
Ekspert bildirib ki, Azərbaycanda quş ətinin istehsalı daha çox yerli idxaldan aslıdır ki, bu da quş ətinin maya dəyərində 70% təşkil edir.
“Bu da sözsüz ki, qiymətə öz təsirini göstərir. Hazırda Azərbaycanda quş əti ilə bağlı tələbatının 60 faizdən çoxunu yerli istehsal təmin edir. Ölkə ərazisində quş əti istehsalını 30-40 faiz artırıb. Daxili bazarda yumurta ilə tam təlabat təmin edilir, quş ətinin idxalı isə 25% təşkil edir. Göründüyü kimi böyük faiz deyil”.
Sonda iqtisadçı qeyd edib ki, əgər bəzi ölkələrdən quş ətinin idxalına qadağa qoyulsa belə, bu bahalaşmaya bir müddətlik təsir edəcək.
“Quş ətinin idxalına qadağa düşünürəm qısa müddətli bahalaşmaya səbəb olsa da sonra qiymətlər sabitləşə bilər. Digər tərəfdən isə yerli quşçuluq müəssisələri daha yaxşı inkişaf edə bilər”.
Aysel Şahmar