Əmək və Əhalinin Sosial Müdafiəsi Nazirliyinə bu il iyulun 1-dək aylıq minimum əməkhaqqının saatlıq minimum əməkhaqqı ilə əvəz edilməsi ilə bağlı təklifləri hazırlaması və aidiyyəti üzrə təqdim etməsi tapşırılıb. Bu məbləğ necə hesablanacaq? Belə olan halda minimum əməkhaqqı da arta bilərmi ?

Mövzu ilə bağlı iqtisadçı alim Elmir Səfərli Ednews-a açıqlamasında bildirdi ki, məsələ ilə bağlı müxtəlif hesablama formaları var: 

“Birinci növbədə, saatlıq ödəniş verilməsi və əmək qarşılığında saatbaşı hesabına əmək haqqının ölçülməsi sistemi mövcuddur. Sadəcə olaraq bundan sonra bəzən elə olur ki, bir işçini şirkətlər və müəssisələr aylıq müəyyənləşdirilən iş saatı həcmindən daha aşağı səviyyədə çalışdırırlar. Məsələn, 148 saatıq iş saatı varsa, həmin ay üçün və həmin işçi 130 saat işləyirsə, onun tam olaraq minimal aylıq əmək haqqı ilə təmin edilməsi deyil, saatbaşı əmək haqqı ilə təmin edilməsi və eyni zamanda həmin əmək haqqı üzərindən müəyyənləşdirilən ödənişlərin verilməsi nəzərdə tutulur. Düşünürəm ki, bu əslində yaxşı bir addımdır. Çünki proqnozlaşdırılır ki, şirkətlərin burdakı minimal əmək haqqı xərcindən qaçıb insanları daha çox işlədiyi iş yükünə və gücünə görə qiymətləndirilməsi daha faydalı olacaq”. 

Ekspert qeyd etdi ki, digər tərəfdən minimal əmək haqqının qaldırılması üçün hər il milli məclis tərəfindən danışıqlar və müzakirələr aparılır: 

“Nazirliklər və aidiyyatı qurumlar üzrə müəyyən təkliflər verilir. Hər il təyin olunan real infliasiya həddi qədər əmək haqqının növbəti ildə artırılması büdcədə nəzərdə tutulur və proqnozlaşdırılan büdcə gəlirləri və eyni zamanda həmin il üçün reallaşdırılan büdcə gəlirləri imkan verirsə, növbəti il üçün inflasiya həddi qədər minimum əmək haqqının artırılması nəzərdə tutulur. Bu il üçün də düşünürəm ki, bu addım atılacaq və minimum əmək haqqının istiqamətində artıq işlər başlayıb. Noyabr ayına qədər isə saatbaşına əmək haqqının ödənilməsi sistemi artıq nəzərdə tutulub”.

Aysel