Fevralın 15-dən 3-cü, yəni "buster" doza peyvənd vurdurmayan şəxslər restoran, mehmanxana və ticarət mərkəzlərində qapalı məkanlara buraxılmayacaqlar. Qadağa toyların aktiv keçirildiyi bir vaxtda qüvvəyə mindiyi üçün bəzi insanlar tərəfindən narazılıqla qarşılanıb. Onların fikrincə, iki doza edilən vaksinasiya yetərli ola bilərdi, 3-cü haradan çıxdı?
Həqiqətənmi 3-cü, “buster” dozaya ehtiyac var?
Millət vəkili Razi Nurullayevin sözlərinə görə, “buster” doza tələbi təkcə Azərbaycanın deyil və Ümumdünya Səhiyyə Təşkilatı tərəfindən qoyulub. Ona görə də biz də bir millət olaraq, verilən qərarlara əməl etməliyik.
“Bu qayda birmənalı olaraq, bütün dünyada tətbiq olunub. Bu gün Azərbaycan vətəndaşı “buster” doza vurdurmayıbsa onu xaricə də buraxmırlar. Bütün dünya alimlərinin mövqeyinə görə, ən yaxşı qorunma üsulu peyvəndlənmədir. Heç kim “buster” dozadan ölməyib, amma xəstəlikdən ölənlər var”.
Millət vəkili özü bu əmələ tabe olaraq, 3-cü doza vaksinasiya olduğunu deyib. Söhbət zamanı o, həmçinin o vurğulayıb ki, peyvənddən sonra bir müddət xəstə yatıb.
“Ona görə, düşünürəm ki, tezliklə qrip əleyhinə də peyvənd elətdirim. Bütün dünyada insanlar ildə bir dəfə, sentyabr-oktyabr aylarında qrip əleyhinə vaksin vurdururlar. Bu vətəndaşların sağlamlığının qorunması üçündür və dövlət tərəfindən pulsuz təmin olunursa, peyvəndlənməyə getmək lazımdır. O qədər insan var ki, xəstəxanaya yerləşdirilməlidir. Həmin insanların çoxu “buster” dozanı vurdurmayıb. Heç “103” də onlara köməyə gəlmir, evdə pis vəziyyətdə qalırlar. Bir çoxunun da pulu yoxdur ki, müalicə eləsin. O baxımdan dirəniş göstərmək lazım deyil. Ona görə “Buster”i deputatat da, sadə vətəndaş da, hamı vurdurmalıdır”.
Razi Nurullayevin də qeyd etdiyi kimi 3-cü dozanı vurduranların çoxu bildirir ki, vaksinasiyadan sonra bir müddət xəstə yatıblar. Xəstəlik üşütmə, boğaz ağrısı və qızdırma ilə müşahidə olunub.
Bəs, insanlar niyə xəstələnir?
Vaksinasiyanın əks göstəriciləri və onun yaratdığı əlamətlər barəsində həkim infeksionist, terapevt, pulmonoloq Rasif Bağırovla söhbətləşdik. O, Ednews-a açıqlaması zamanı "buster" dozası ilə bağlı bir neçə maraqlı faktları qeyd edib.
“İlk onu qeyd edim ki, 1-ci və 2-ci doza arasında qısa zaman olduğu üçün insanlar orqanizmlərində baş verən prosedurları çox hiss etmirlər. Çünki 1-ci dozanı vurdurduqda orqanizmdə kifayət qədər antitel yaranır və 2-ci vaksinasiyada bu, hiss olunmur. "Buster" – gücləndirilmiş doza isə digərlərindən fərqli olaraq, uzun müddətdən sonra vurulduğu üçün insan orqanizmində müdafiə faktorlarında kifayət qədər azalma gedir”.
Həkim qeyd edib ki, bu proses tam sağlam olan insanlarda cüzi hiss olunduğu halda, yaşlı və xroniki xəstəliyi olanlarda bir qədər fərqli olur. Onun sözlərinə görə, bu zaman yuxarı tənəffüs yollarında, ürəkdə və s. problemi olan xəstələrdə “buster” doza güclü temperatur, halsızlıq, digər müxtəlif əlamətlərlə müşahidə olunur.
"Çünki buster orqanizmdə bir az gərginlik yaradır. Orqanizmin bioaktivliyini artırır, müəyyən iltihab mediatorlarının uclarını qaldırır və xroniki xəstəliklər oyanmağa başlayır. Yuxarı tənəffüs yollarında sakit vəziyyətdə qalmış viruslar gücünü artırır, fəaliyyətini işə qoşur və insan adi qrip kimi bir virusa yoluxur".
Rasif Bağırov əminliklə bildirib ki, "buster"dən sonra yeni dozaya ehtiyac qalmayacaq.
“Buster gücləndirilmiş dozadır. Yeni dozanın olub-olmayacağını dəqiq bilmək üçün kifayət qədər çox tədqiqat aparılmayıb. Ancaq konkret olaraq Avropada hələ ki, 3-cü dozadan başqa yeni doza haqda bir şey demirlər”.
Gülnar Səlimova