Xəbər verdiyimiz kimi, bu gün Milli Məclisin plenar iclası keçirilib. İclasda millət vəkili Tahir Kərimli əhalinin aztəminatlı təbəqəsi üçün ucuz apteklər açılması təklifi ilə çıxış edib.

Bununla bağlı Ednews-a danışan həkim-radioloq Aydın Əliyev güzəştli qiymətlərlə aptek şəbəkələrinin yaradılmasına ehtiyac olduğunu bildirib:

“Dövlət tərəfindən qeydiyyata alınan aztəminatlı şəxslər və ailələr, əhalinin xüsusi sosial təbəqələri – təqaüdçülər, tələbələr - var ki, tibbi xərclərini qarşılaya bilmirlər. Onlar üçün ucuz apteklərin yaradılmasına ehtiyac var. Düzdür, İcbari Tibbi Sığorta üzrə Dövlət Agentliyi xidmətlər zərfinə daxil olan bəzi müalicə xərclərini və dərman preparatlarını qarşılayır, lakin bu, kifayət deyil. İmkansız şəxslər üçün dərmanların əlçatanlığını təmin etmək çox yaxşı olardı. Keyfiyyətə gəldikdə isə, ümumiyyətlə, bu, ölkədə problemli məsələdir, keyfiyyətli dərman almaq müşkülə çevrilib. Buna idxal zamanı nəzarət etmək lazımdır. Ölkəyə gətirilən dərman preparatlarının keyfiyyəti ciddi şəkildə yoxlanılmalıdır. Buna nəzarət edən qurum var, lakin onun fəaliyyəti yetərli deyil. Belə olsaydı, aptekdən alıb istifadə etdiyimiz iynə-dərmanın təsirini daha çox hiss edərdik. Xəstələr bundan çox şikayət edirlər, həkimin də reputasiyası aşağı düşür. Həkim dərman yazır, xəstə onu qəbul edir, amma yetəri qədər effekt ala bilmir. Sonra da düşünürlər ki, həkim yaxşı deyil, yaxşı müalicə yazmadı və s. Dərman məsələsi ümumiyyətlə, strateji məsələdir. Həm idxalına, həm qiymətinə, həm də keyfiyyətinə ciddi dövlət nəzarəti olmalıdır. Dərmanların keyfiyyətinə depolarda saxlanılma şəraiti də təsir edir. Elə preparatlar var ki, saxlanma qaydalarına əməl etmədikdə keyfiyyətini itirir”. 

Səhiyyə üzrə ekspert, həkim Adil Qeybulla isə əksini düşünür. Onun sözlərinə görə, apteklər dərmanların satışını həyata keçirən tibbi subyektlərdir, onların qiymətlərinə müdaxilə etmək düzgün deyil:

“Apteklərdə qiymətlər bazar rəqabətinə əsasən tənzimlənməlidir. Digər tərəfdən də, apteklərin birini ucuz, birini baha etmək mümkün deyil. Müəyyən vacib dərman preparatları konkret İcbari Tibbi Sığorta paketinə aiddirsə, onların ambulator təyini də xidmətlər zərfi çərçivəsində həyata keçirilməlidir. Əslində, aptekdə dərman satışı olmamalıdır, bunlar hamısı İcbari Tibbi Sığorta ilə baş verməlidir. Dünyanın hər yerində bu proses belədir. Hesab edirəm ki, digər variantlar özünü doğrultmayacaq".  

Törə Zeynal