Xəbər verdiyimiz kimi, paytaxtın Yasamal rayonunda ikimərtəbəli yaşayış evinin birinci mərtəbəsində partlayış baş verib.
EDnews xəbər verir ki, hadisə nəticəsində 3 nəfər müxtəlif dərəcəli bədən xəsarətləri alıb, 16 yaşlı yeniyetmə isə həyatını itirib.
APA-ya istinadən partlayışın baş vermə anının görüntülərini təqdim edirik:
13:17
İyulun 4-ü saat 08:40 radələrində Respublika Təcili və Təxirəsalınmaz Tibbi Yardım Mərkəzinə Bakı şəhəri, Yasamal rayonu, Ümid Ələkbərov küçəsində yerləşən yaşayış evində partlayış hadisəsinin baş verməsi ilə bağlı çağırış daxil olub.
Bu barədə EDnews-un sorğusuna cavab olaraq TƏBİB-dən bildirilib.
Çağırış ünvanına təcili tibbi yardım briqadası cəlb edilib.
Bildirilib ki, hadisə nəticəsində 3 nəfər -2 qadın və 1 kişi termiki yanıq diaqnozu ilə Nərimanov Tibb Mərkəzinin nəzdində fəaliyyət göstərən Yanıq Mərkəzinə hospitalizasiya olunub.
Pasiyentlərə zəruri tibbi xidmət göstərilib. Hazırda onların müalicəsi Reanimasiya şöbəsində davam etdirilir, vəziyyətləri ağır qiymətləndirilir.
Qeyd olunub ki, hadisə baş verən ərazidən keçərkən daha 1 nəfər qadın da xəsarət alıb.
Kliniki Tibbi Mərkəzin Təcili tibbi yardım şöbəsinə hospitalizasiya olunan pasiyentə zəruri tibbi xidmət göstərilib.
Hazırda onun müalicəsi davam etdirilir, vəziyyəti stabil qiymətləndirilir. Pasiyentin ambulator müalicə üçün evə buraxılması planlaşdırılır.
Aytac Kərimova | EDnews
11:15
Bakı şəhəri, Yasamal rayonu, Ümid Ələkbərov küçəsində yerləşən yaşayış evində partlayış baş verib.
EDnews xəbər verir ki, bu barədə Fövqəladə Hallar Nazirliyi (FHN) məlumat yayıb.
Bildirilib ki, partlayış ikimərtəbəli yaşayış evinin birinci mərtəbəsində qeydə alınıb.
Yanğın nəticəsində ayrı-ayrı vətəndaşlara məxsus ümumi sahəsi 250kv.m. olan evin birinci mərtəbəsində yerləşən iki otağın yanar konstruksiyaları 50kv.m. sahədə yanıb.
Hadisə nəticəsində 3 nəfər müxtəlif dərəcəli bədən xəsarətləri alıb, xilasedicilər tərəfindən 2010-cu il təvəllüdlü vətəndaşın meyiti çıxarılaraq aidiyyəti üzrə təhvil verilib.
Hadisə ilə əlaqədar müvafiq qurumlar tərəfindən araşdırma aparılır.
