Türkiyənin Van bölgəsinə təşkil olunan mediatur çərçivəsində dünyanın müxtəlif ölkələrindən gələn jurnalistlər bu bölgənin ən qədim yerlərindən sayılan Səlçuqlu Meydan məzarlığında olublar.
Ednews xəbər verir ki, Anadolunun giriş qapısının ən önəmli nöqtəsi hesab edilən “Ahlat” istər coğrafi mövqeyi, istərsə də tarixi ilə ön plana keçən yerlərdən hesab edilir.
Neolit dövrünədək uzanan keçmişə malik qəbirstanlıq b.e.ə. 4000-ci ildə Hurrilərlə başlayaraq müxtəlif Osmanlı dövlətlərinin nəzarəti altında olub.
Səlçuqlu Meydan qəbirstanlığı Ahlatda yerləşən ən böyük və strateji əhəmiyyətə malik ərazi hesab edilir. 210.000 kv.m. ərazisi olan qəbirstanlıqda təxminən 9000 məzar yerləşir. Qəbirstanlıqda bu günədək aparılan epiqrafik araşdırmalar nəticəsində 32 sənətkarın imzası aşkar edilib. Bu tarixi ərazi türk-islam qəbirstanlıqları arasında ərazisinin böyüklüyünə görə ilk sırada yer alır.
Qəbirstanlıqda ümumilikdə Şahidli Tabutlar (şəkilli), Sarkofaq və Məqbərə olmaqla, 3 məzar tipi mövcuddur. Bu məzarlar əsasən Ahlatın elm və din xadimlərinə məxsusdur. Qəbirstanlığın ən vacib hissəsini “Kadılar” təşkil edir. Kadılar o zamanki hakimlər sayılırdılar.
Məzar daşlarının bəzilərində mərhuma aid şəxsi məlumatlar, aid olduğu bölgə, digərlərində isə onların vəzifələri və peşələri qeyd olunub. Bu məlumatlardan əlavə daşların üzərində iki başlı əjdaha motivləri və müxtəlif toxunuşda oyma naxışlar da yer alıb. Daşın arxa tərəfində isə məzar müəllifinin adı, Qurani Kərimdən ayələr, geometrik naxışlar və bitki mənşəli bəzəklər həkk olunub. Sinə daşlarında isə əsasən hədislərdən ibarət yazılar qeyd olunub.
Anadolunun əsas mülkiyyəti hesab edilən və XII-XVI əsrlərə qədər tarixə söykənən Ahlat Selçuklu meydan qəbristanlığı bu bölgədə Orhun Abidələrini təmsil edən əsas tarixi ərazisidir.
Tarixi məzarlıqda çəkilən görüntüləri təqdim edirik:
Vüsalə Balayeva, Türkiyə, Van
