Şotlandiyanın LoÇ Ness gölündəki "canavar" əfsanəsi elə gəlirli bir sahəyə çevrilib ki, yerli rəhbərlik indi yüksək maaşla turistləri göldə gəzdirəcək bir kapitan axtarır.
“EDnews” xəbər verir ki, Loç Ness gölündə canavar yaşadığına dair iddialar 1800-cü illərin əvvəllərindən bəri turistlərin bölgəyə axın etməsinə səbəb olub. Əslində, heç bir sənaye və istehsal sahəsi olmayan bu kiçik qəsəbə yoxsulluqla mübarizə aparmaq əvəzinə, artıq 200 ildir ki, bu canavarın varlığı sayəsində dolanır.
Zaman-zaman yayılan bulanıq və şübhəli fotoşəkillər xüsusilə 1900-cü illərdə bu əfsanəyə inanmağı sevən turistləri sevindirib. Lakin bu gün 8K keyfiyyətində foto çəkə bilən smartfonlar hər kəsin əlində olduğu halda, hələ də canavarın aydın bir görüntüsünün olmaması, insanların bu nağılı şübhə altına almasına səbəb olur.
Üstəlik, əgər göldə həqiqətən tarixdən əvvəlki dövrlərə aid bir dinozor növü yaşayırdısa, müasir texnologiyalarla onu çoxdan aşkar etmək mümkün olardı. Hərbi donanma və elmi ekspedisiyalar illərlə aparılan axtarışlara baxmayaraq canavarın izinə rast gəlməyib. Bütün bunlara baxmayaraq, Loç Ness əfsanəsi turizm üçün hələ də böyük gəlir mənbəyidir.
Turistlər üçün yeni oyun: "Bədheybət ovçusu" kapitan axtarılır!
Loç Ness rəhbərliyi turistlərin marağını diri saxlamaq üçün yeni bir yol tapıb – axtarış turu üçün gəmi kapitanı işə götürmək!
Kapitanın işi sonar və müasir axtarış cihazları ilə təchiz edilmiş bir gəmini idarə etməkdən ibarət olacaq. O, turistlərlə birlikdə gölü skan edəcək, onlara əfsanələr danışacaq və günün sonunda heç bir canavar tapmadan geri qayıdacaq.
Bu turistik gəmi səyahətində turistlərə yemək və içki təqdim ediləcək, sonar ekranında "sirrli dalğalar" araşdırılacaq və hər gün "həyəcanlı" bir macəra yaşanacaq. Bunun üçün turistlər adam başı yüzlərlə funt-sterlinq ödəyəcək və kapitanın maaşı da ayda 5.000 funt-sterlinqdən (təxminən 11.000 manat) çox olacaq.
Bədheybət tapılmasa da, turistlər gəlməyə davam edəcək
Bu yeni iş təklifinə baxanda turistlərin heç vaxt Loç Ness canavarını tapmayacağına əmin olmaq olar. Lakin bu macəra "Loç Nessdə canavar axtarıram!" adı ilə Instagram və "TikTok"da paylaşılmağa çox uyğundur.
Bu səbəbdən də gölə axın edən turistlərin sayı azalmayacaq, əksinə daha da artacaq. Belə görünür ki, Loç Ness qəsəbəsi bu işdən hələ uzun illər pul qazanmağa davam edəcək!
