Beynəlxalq ekspert və Ceymstaun Fondunun idarə heyətinin üzvü, əvvəllər ABŞ-ın Azərbaycandakı səfiri vəzifəsində çalışmış Metyu Brayza qeyd edib ki, “Mariya Zaxarovanın Moskvanın İrəvan və Bakını münasibətləri normallaşdırmağa təşviq etməsindən başqa bəyanatında yeni heç nə yoxdur”. O, bu barədə Ednews-a Mariya Zaxarovanın Zəngəzur dəhlizi ilə bağlı fikirlərini şərh edərkən bildirib.
Keçən gün Rusiya Xarici İşlər Nazirliyinin rəsmisi Mariya Zaxarova bəyan edib ki, Zəngəzur dəhlizi Ermənistanla Azərbaycan arasında münasibətlərin tənzimlənməsində həlledici rol oynayır. O, həmçinin qeyd edib ki, Ermənistan ərazisindən Azərbaycanı Naxçıvan Muxtar Respublikası ilə birləşdirən nəqliyyat marşrutunun bərpası layihəsinə baxılır. O, "Bu layihənin həyata keçirilməsində biz İrəvanla Bakı arasında münasibətlərin normallaşması istiqamətində əhəmiyyətli irəliləyiş potensialını görürük. Hər şey ölkələrin siyasi iradəsindən və onların konkret razılaşmalara hazır olmasından asılıdır".
Keçmiş səfir qeyd edib ki, Zəngəzur dəhlizinə dair çağırış artıq prezident Putinin vasitəçiliyi ilə aparılan danışıqlar çərçivəsinin bir hissəsidir. O izah edib ki, "Noyabrın 10-da baş nazir Paşinyan və Prezident Əliyevin və Putinin özünün də imzaladığı atəşkəs bəyanatında Zəngəzur dəhlizinin açılması çağırışı var. Bundan əlavə, 2021-ci il yanvarın 11-də üçtərəfli saziş imzalanıb. Rusiya, Azərbaycan və Ermənistanın liderlərinin irimiqyaslı infrastruktur layihələrində, xüsusən də nəqliyyat sahəsində əməkdaşlıq etməsi ilə bağlı razılaşmalar da yer alır. Bu, Rusiyanın uzunmüddətli siyasətinin nümunəsidir”.
Brayza hesab edir ki, Zəngəzur dəhlizinin açılması istiqamətində ən mühüm addımlar Prezident Əliyev və baş nazir Paşinyanın Azərbaycan və Ermənistan arasında sülh müqaviləsinin imzalanması və iki ölkə arasında beynəlxalq sərhədin demarkasiyası olacaq. O, əlavə edib: "Ermənistan tərəfinin Zəngəzur dəhlizinə davam etməməsinin səbəbi odur ki, münaqişənin davam etməsini istəyən və başqa bir müharibə aparmaq arzusunda olan çoxlu insanlar, Paşinyanın əleyhdarları var. Onlar nə vaxtsa, günlərin birində kim bilir, bəlkə də, on il, hətta yüz ildən sonra da Azərbaycan və Türkiyə kimi digər ölkələrdən əraziləri geri almağa cəhd eymək istəyən, orta əsrlərdən qalma Böyük Ermənistan dövlətini dirçəltmək eşqinə düşənlərdir.Bu şəxslər uzun bir müddət Ermənistan siyasətinin bir hissəsi olaraq qalacaqlar. Lakin Azərbaycanla Ermənistan arasında sülh müqaviləsi bağlanandan və sərhəd demarkasiya olunandan sonra heç bir əsaslı addım ata bilməyəcəklər”.
Onun sözlərinə görə, Zəngəzur dəhlizinin əhəmiyyəti göz qabağındadır: "Mariya Zaxarova bəyan edib ki, bu, İrəvanla Bakı arasında münasibətlərin normallaşmasına kömək edə bilər. Bundan əlavə, Zəngəzur dəhlizi təkcə nəqliyyat baxımından deyil, həm ermənilərə, həm də azərbaycanlılara fayda verən iş yerləri və iqtisadi artım yaradacaq investisiya cəlb etməklə iqtisadi əməkdaşlığın müxtəlif yeni modellərini yaradacaq”.
Ülviyyə Şahin
