Bu yaxınlarda Rusiya hökuməti 2024-cü il mayın 31-dək bərk buğdanın ixracına qadağa qoyub. Qərar ərzaq təhlükəsizliyini təmin etmək və daxili Rusiya bazarında qiymət sabitliyini qorumaq məqsədi daşıyır. Xatırladaq ki, Azərbaycan taxıl idxalının çox böyük bir qismi Rusiyadan aslıdır. 

Vəziyyət belə olduqda, taxıl tələbatını qarşılamayan Azərbaycan bundan necə təsirlənəcək?

İqtisad üzrə fəlsəfə doktoru Xalid Kərimli, Ednews – a açıqlamasında söyləyib ki, qərarın əsas məqsədi Rusiyanın öz daxili bazarını qorumaqdır:

“Azərbaycanda ümumiyyətlə bazarın 58 – 59 % - ni yerli yığım ödəyir. Lakin ərzaqlıq buğdanın ancaq 25% - ni yerli yığım ödəsə də, 75% - i xaricdən idxal olunur. Bu o deməkdir ki, xaricdən idxal olunan buğda, əsasən ərzaqlıq buğdadır. Ərzaqlıq buğdanın 95% - ni isə Rusiyadan idxal edirik. Lakin burada sizin sorğunuza uyğun xatırlatma edim ki, bu qadağa ərzaqlıq buğdanın ixracatına aid edilməyib. Burada əsasən bərk buğda növündən danışılır. Düşünürəm ki, bu qərar ərzaqlıq buğda idxal edən ölkələrə təsir etməyəcək. Rusiya üçün bu qərarın əsas məqsədi öz dəyirmanları üçün əlverişli şərait yaratmaqdır. Həmçinin bununla birlikdə məhsulun əlavə dəyəri xammal kimi deyil, yarım – fabrikat kimi saxlanılmasını təşkil edir. Öz istehsalına dəstək verir, daxili bazarını qoruyur. 

Ekspert hesab edir ki, bunun ölkəmizə heç bir ziyanı olmayacaq:

Ümumiyyətlə 2023 – cü ilin noyabr ayında taxıl qiymətləri 3% aşağı düşüb. Buğdanın öz qiyməti isə 2.4% aşağı düşüb. Həm Argentinada, həm də Avstraliyada hazırda yığım dövrüdür. Bundan savayı bu il Rusiyanın özündə buğda yığımı olduqca yüksək səviyyə olub. Taxıl qiymətləri də hazırda ötən il ilə müqayisədə 20% aşağı düşüb. Hazırki günümüzdə də aşağı düşmə dayanmayıb və davam edəcək. Nəticə etibarilə də bu qərarın ölkəmizə ziyan vuracağını düşünmürəm”.

Əkbər Novruz