Qərb mediasında paylaşılan xəbərlərə görə, Avropa Şurasının sədri Şarl Mişel Avropa Parlamentinə namizədliyini irəli sürəcəyini açıqlayıb. Bu da öz növbəsində Mişelin tezliklə vəzifəsini tərk etmək məcburiyyətində qalması deməkdir. Onun vəzifəsinə isə ilkin namizədlərdən Viktor Orban göstərilir.
Bu vəzifə dəyişikliyi regionumuza hansı yeni perspektivləri gətirə bilər? 

Ednews xarici ekspertlər arasında sorğu keçirib.

Rus əsilli amerikalı politoloq Endryu Koribko:

“Mişeli kimin əvəzləyəcəyi ilə bağlı spekulyasiya etmək hələ tezdir, amma bu, həqiqətən də Orbandırsa, o, bu mövqedən bacardığı çərçivədə qurumun bəzi siyasətlərinə mane olmağa çalışa bilər. Mən Aİ qanunvericiliyinin incə detalları haqqında çox məlumatlı deyiləm, ona görə də onun bu baxımdan nə qədər irəli gedə biləcəyini dəqiq bilmirəm”.

Alman analitik Brendan Freyser:

“Şarl Mişelin istefa etməsi Cənubi Qafqaz regionundakı sülh perspektivi dəyişə biləcək cinsdən bir hadisə olduğunu düşünürəm. Mişelin motivləri və perspektivlərini pozitiv, lakin “dişsiz” qeyd etmək olar. Ən azından iki ölkə arasında yaxınlaşmanın təmini adına ola bildiyincə zəhmət çəkilib. Lakin dediyim kimi, son nəticəyə baxsaq “dişsiz” qaldığını vurğulamaq lazımdır. Hazırda bu hadisə ilə birlikdə, Rusiyanın vasitəçilik rolu hələlik Ermənistan tərəfindən pozitiv qarşılanmadığı üçün artıq sülh prosesində sürətlənmə, vasitəçilərsiz danışıqların başlandığı dövrə addım atılmağın vaxtıdır. Sizin söylədiyiniz Orbanın vəzifəyə gəlməsi məsələsi isə hələlik rəsmi deyil, lakin medida ehtimalı yüksək qiymətləndirilir. Türk Dövlətlərinə qarşı sahib olduğu dostcanlı mövqeyindən dolayı olaraq həm Türkiyə, həm də Azərbaycan bu vəzifə dəyişikliyindən böyük xeyir əldə edə bilər. Əsasən də Orbanın realistik düşüncə tərzi hazırki münaqişələrə ayrı və maraqlı perspektiv gətirəcəkdir”.

Əkbər Novruz