"Problemin həm çoxşaxəli, həm də arealının geniş olmağı, bu mövzunun geniş müzakirəsinə səbəb olur. Yəni problem bir deyil. Boşanma deyəndə problem bir imiş kimi görünür, lakin altında çox səbəb yatır. Ölkədə hər iki nikahdan biri ayrılma ilə nəticələnir. Bu ölkə üzrə çox təhlükəli rəqəmdir. Bu həm ölkənin ailə institutu üçün, həm cəmiyyət üçün, həm də ümumiyyətlə qadın-kişi münasibətləri, demoqrafik artım üçün, sosial, mədəni, mənəvi deqradasiya deməkdir. Həll yolların axtaranda qeyd elədiyimiz bütün istiqamətlərdən həllinə başlamaq lazımdır". 

Bu sözləri Ednews-a açıqlamasında sosioloq Lalə Mehralı deyib. Onun sözlərinə görə, uğursuz evliliyin səbəbi əslində fərddən-fərdə görə dəyişir:

"Biz konkretləşdirib deyə bilmərik ki, evliliklər konkret 3 ya 5 səbəbdən dağılır. Üzdə görünən sosial probləmlər, işsizlik, uyğunsuzluq və s. ola bilər, lakin bunun altında digər mənəvi aşınma, insanların eqosu, tətminsizlik, mənəviyyat hissinin itirilməsi, vicdan, ədalət, mərhəmət kimi xüsusiyyətlərin yox olması yatır.

Ümumiyyətlə, dünya bütün ən yaxşı xüsusiyyətlərini itirən insanların toplaşdığı xaotik bir cəmiyyətə çevrilir. Çox sadə məsələləri böyüdərək problem halına gətiririk, ən xırda səbəblərdən ailəmizi dağıdırıq, olmayacaq şeylərə görə qanımızı qaraldırıq, başqasının könlünə toxunuruq, incidirik. Bir-birimizi qırmağa, incitməyə çox meyilli olmuşuq, hamımız kin qusuruq. Bu aşınma da burdan yaranır. Biz başqasının könlünə dəyməyi adət halına gətirmişik, evlilik bizim üçün müqəddəsliyini itirəli çox olub. 

Problemin həlli üçün nə edilir deyə soruşursunuz, əlaqədar komitə deyir ki, tədbir görülür, planlar işlənir, müzakirələr gedir, amma nəticə bunu göstərmir. Təkcə yanvar-fevralı aylarındakı statistika bizə vəziyyətin necə olduğunu aydın şəkildə göstərir. 7 min nikahdan tam yarısı boşanma ilə nətişələnib, əlavə sözə ehtiyac varmı?"

Oğuz