“Prezident İlham Əliyevin Münxen Təhlükəsizlik Konfransında iştirakı, burada keçirdiyi görüşlər ABŞ-ın Azərbaycanla münasibətlərin keyfiyyətcə yeni mərhələyə qalxmasında maraqlı olduğunu deməyə əsas verir. Buna bariz nümünə kimi ölkə başçısının ABŞ Dövlət katibi Entoni Blinkenlə görüşünü göstərmək olar”.
Bu sözləri deputat Könül Nurullayeva Ednews-a açıqlaması zamanı deyib. O, qeyd edib ki, görüşdə Blinken Azərbaycanın COP29-a ev sahibliyini üzərinə götürməsini təqdir edərək, ölkəninin dəstəyini ifadə etdi. “Vaşinqtonun bu tədbirin uğurlu olması, eyni zamanda, Azərbaycan və Ermənistan arasında davamlı və ləyaqətli sülhün təmini üçün əllərindən gələni edəcəkləri bildirilib. Rəsmi Bakı isə Ermənistanla sülhün qısa zamanda bağlanmasını milli maraqlarına uyğun addım hesab edir. Bu barədə Prezident İlham Əliyev Blinkenlə görüşdə bildirdi. MTK çərçivəsində Ermənistanın baş naziri Nikol Paşinyanla keçirilən ikitərəfli görüş, sülh müqaviləsinə dair danışıqlar, sərhədlərin delimitasiyası üzrə görüşlərin keçirilməsi ilə bağlı razılaşmaların əldə olunması müsbət addım kimi qiymətləndirilib. Prezident İlham Əliyevin mövqeyi bundan ibarət olub ki, Azərbaycan-ABŞ ikitərəfli əlaqələri Ermənistanla Azərbaycan arasında münasibətlərin normallaşması prosesindən kənar şəkildə inkişaf etdirilməlidir”.
Deputat həmçinin qeyd edib ki, Münxen səfəri çərçivəsində Prezident İlham Əliyevin 3 ABŞ rəsmisi ilə görüşməsi əlaqələrin inkişaf perspektivlərinin olduğunu bir daha nümayiş etdirib.
“Ermənistanın destruktiv mövqeyilə bağlı Bakı ilə Vaşinqton arasında müəyyən anlaşılmazlıqlar yaradan məsələlərin artıq keçmişdə qaldığını söyləmək olar. Tərəflər əslində əməkdaşlığın inkişafı perspektivlərini dəyərləndirməkdə maraqlıdırlar.
Məlumdur ki, ABŞ və Azərbaycan arasında əməkdaşlıq və tərəfdaşlığın böyük tarixi var. Ölkələr arasında münasibətlərin siyasi, iqtisadi, ticarət, təhlükəsizlik, enerji və digər sahələrdə əməkdaşlıq üçün böyük perspektivləri mövcuddur. Azərbaycanın ev sahibliyi edəcəyi COP29 isə iki ölkə arasında əməkdaşlıq üçün daha böyük imkanlar yaradır.
Ermənistan-Azərbaycan normallaşma prosesi də təbii ki, davam edir. Azərbaycan dəfələrlə bəyan edib k i, biz regionda sülhün və sabitliyin tərəfdarıyıq. ABŞ-ın bunu alqışlaması prosesə yalnız töhfə verə bilər”.