Ermənistan parlamentinin deputatı Tiqran Abramyan Ermənistan KİV-ə açıqlamasında İranın İrəvana hərbi sahədə əməkdaşlığı aktivləşdirmək üçün yollar və mexanizmlər axtardığını, hərbi təlimatçıların göndərilməsi və birgə təlimlərin keçirilməsini təklif etdiyini söyləyib. O, qeyd edib ki, buna səbəb “Syunik” ( Zəngəzur) bölgəsi ilə bağlı narahatlığın olduğu göstərilib. 

Bəs bu iddia, İran və Azərbaycan arasında yumşalmanın olduğu dövrdə nə qədər doğrudur?

Ednews – a açıqlamasında Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan Bakı və Tehran hökümətləri arasında münasibətlərin gərgin fonda qaldığını söyləyib:

“İki ölkə rəsmiləri arasında açıqlamalar, səfərlər, ölkələr arasında münasibətlərin bərpasına və yaxud gərginliyin aradan qalxması anlamına gəlmir. Eləcə də İranın İrəvana dəstək verməsi, hərbi əlaqələri saxlamaq istəməsi kimi məsələlər, Ermənistan cəmiyyətində müzakirə olunan mövzulardandır. Hətta Ermənistanda Rusiya qoşunlarının yerinə İran qoşunlarının gətirilməsini istəyənlər də var. İranın Zəngəzur yolu ilə bağlı mövqeyi Azərbaycan hakimiyyətinə və cəmiyyətinə bəlli olduğundan rəsmi Tehranın İrəvanla bütün istiqamətlərdə danışıqlarını, əməkdaşlığı, birbaşa və ya dolayısıyla Azərbaycana istiqamətləndiyi istisna olunmur”. 

Həmsöhbətimiz, şərti sərhəddə fevral ayının 12 – də baş verən təxribatın bunun daha bir nümunəsi olduğunu vurğulayıb:

“Ermənistan baş naziri Nikol Paşinyan bildirir ki, hərbi sahədə əməkdaşlığı şaxələndirmək lazımdır. Əvvəllər Ermənistan hərbi texnikanı Rusiyadan alırdısa, indi Hindistan, Fransadan alır. Həmin bu perspektiv daxilinə ola bilsin ki, İran da əlavə olunsun. Hərçənd bundan savayı ABŞ – dan belə silah – sursat alınması istisna edilmir.

Burada isə belə bir sual yaranır: Ermənistan bu silahları niyə alır?

Son hadisələr təsdiqləyir ki, Ermənistan hakimiyyəti bu silahlardan qonşu ölkələrə tətbiq etmək niyyətindədir. Fevralın 12 – də Azərbaycan – Ermənistan sərhədyanı bölgədə törədilən təxribat, bunu bir daha təsdiqlədi. Odur ki, İran, Ermənistanla bütün istiqamətlərdə əməkdaşlığı, hələ ki, Azərbaycanın əleyhinədir. Bu da Azərbaycan üçün müəyyən narahatlığa da səbəb ola bilər. Nəticədə bu məsələ Azərbaycan və İran dövlətləri arasında gərginliyin azalmasında gündəlikdə olacaq müzakirə mövzularından biri ola bilər”.

Əkbər Novruz