ABŞ prezidenti Co Bayden San Fransiskoda ianə kampaniyasında iştirakı zamanı mətbuata verdiyi açıqlamasında, Rusiya prezidenti Vladimir Putinin ünvanına bir sıra təhqiramiz ifadələr bildirib. Onu yumşaq dillə desək “it oğlu” (son of a bitch) adlandırıb və əlavə edib ki, onun kimi şəxslərə görə biz hər zaman nüvə münaqişəsindən narahat olmalıyıq.
Maraqlısı odur ki, Baydendən savayı son zamanlarda dünyanın aparıcı bir sıra liderləri yeni bir dünya müharibəsinin çıxacağı ilə bağlı bir sıra fikirlər səsləndirib. Bəs bu dünya üzərində nüvə müharibəsinin başlanğıcının xəbərçisi ola bilərmi?
İlk öncə nüvə silahları ilə təchiz olunmuş ölkələrin adlarına baxaq.
Hazırda dünya üzərində 9 ölkə rəsmi olaraq nüvə silahları ilə təchiz olunub. Ümumilikdə isə qlobal nüvə ehtiyatı 13.000 silaha yaxındır. Yəni potensial bir müharibə ehtimalında bu ölkələr ümumilikdə bu qədər nüvə silahından istifadə edə bilər.
Lakin məsələ burasındadır ki, bu silahların istifadəsi bir o qədər də asan deyil. Belə ki, nüvə silahlarının sayının çoxluğuna görə 5 ölkə - Çin, Fransa, Rusiya, Böyük Britaniya və ABŞ Nüvə Silahlarının Yayılmaması haqqında Müqavilənin üzvüdürlər. Bu da o deməkdir ki, bu aparıcı ölkələr hazırda rəsmi olaraq nüvə silahlarının istifadəsini qadağan ediblər. Bu müqavilə 1968 – ci ildə imzalanıb. Bu müqavilədən kənarda isə Hindistan, Şimalı Koreya və Pakistan, silahların istifadəsi edilməməsi ilə bağlı heç bir müqavilənin iştirakçısı deyillər. Geridə isə 1 ölkə qalır o, isə İsraildir. 90 ədəd nüvə başlığına sahib olduğu güman edilir.
İrlandiyalı hərbi ekspert Deklan Makkelli Ednews – a bildirib ki, açıqlamalarda bu ehtimalın yüksək olmasına baxmayaraq, praktikada bunu etmək elə də asan deyil.
“Etiraf etmək lazımdır ki, hazırda dünya siyasətinin gəldiyi məqam elədir ki, hər an kiçik bir mübahisədən müharibə çıxa bilər. Nüvə silahları ilə təchiz olunan bütün ölkələrdən an etibarı ilə Rusiya və İsrail rəsmi olaraq müharibə şəraitindədirlər. Hərçənd İsrailin sahib olduğu nüvə silahları güman edilir. Ona görə ki, digər nüvə silahına sahib ölkələrlə müqayisədə onların praktikada bu silahları istifadə etdikləri qeydə alınmayıb. Sözsüz ki, İsrailin bunu istifadə etməsi məntiqsiz olardı. Lakin, Rusiyanın olduğu vəziyyətdə hər an hər şey ola bilər. Hərçənd Rusiya da nüvə silahlarını istifadə etməyin bir növ dəlilik olduğunu bilir, lakin Rusiyanın, Nüvə Silahlarının Yayılmaması Haqqında Müqavilədən çıxması gözlənilə bilər. Bundan əvvəl Rusiyanın ya özünün könüllü olaraq, ya da rəqib hesab etdiyi aktorlar tərəfindən bir sıra müqavilə, təşkilatlardan çıxdığını görmüşük. Belə bir hadisə olacağı təqdirdə isə səsləndirilən ifadələrin artıq real olacağını deyə bilərik. Ələxsus böyük və güclü aktorların dünya üzərində baş verən böhran və münaqişələrə göz yumduğu bugünümüzdə, III Dünya Müharibəsi hər zaman aktiv olmaqda davam edəcək. Ya yeni bir dünya nizamı qurulacaq, ya da böyük bir fəlakətin şahidi olacağıq”.
Əkbər Novruz