“Bölgədə ən zəif tərəf Tayvan hesab olunur. Açıq şəkildə Tayvan Çinin iddia etdiyi ərazidir. Yarımkeçirici sənayesinin 70 faizini əlində cəmləyən Tayvanın Çin tərəfindən işğalı çip ticarətini çətinləşdirə bilər”.
Bu fikirləri politoloq Turab Rzayev Ednews-a açıqlaması zamanı bildirib. O, daha sonra qeyd edib ki, son vaxtlar ABŞ xüsusən Sakit okeanın Qərb sahillərinə, Cənub Şərqi Çin dənizi və Tayvan boğazında diqqət artırır:
“ABŞ-a rəqib sayıla biləcək hərbi güc formalaşır. Çin həddən artıq silahlanma edir və hərbi potensialını normadan çox yüksəyə qaldırıb. Çünki həmin bölgədə süni adalar və hərbi postlar yaradıb.
Çinin hazırda milyondan çox quru ordusu var. Eyni zamanda texnoloji cəhətdən Çin öz yerli təyyarə, gəmi və digər hərbi silahları istehsal edir. Sakit okean və Hind okenında hərbi bazalar yaradır. Ən son Kambocada böyük həcmli hərbi baza yaradıb. ABŞ isə həmin bölgədən Yaponiya dənizinə qədər olan yerləri öz müttəfiqləri kimi görür. Yaponiya, Koreya Respublikası, Tayvan və Filippin ABŞ-ın müttəfiqləri hesab olunur. ABŞ ümumiyyətlə bu əraziləri özünün təsir zonası kimi görür. Ona görə də vaxtaşırı olaraq ABŞ bu ölkələrlə diplomatik görüşlər keçirir və Çinə qarşı müdafiə zolağı yaratmağa çalışır”.
Politoloq düşünür ki, ABŞ nə qədər güclü olsa da Çinin üstünlüyü region baxımdan daha çoxdur:
“ABŞ-ın vəziyyəti Çinə nisbətən daha çətin görünür. Çünki Çin öz ölkəsinin yaxınlığında olan sularda döyüşür. Ona görə də okeanın digər tayından gələn ölkə ilə vuruşmaq qismən daha asanlaşır. Eyni zamanda müttəfiq ölkələr ABŞ-ın onların ərazisində Çinlə mübarizə etməyə icazə verməyə bilərlər. Gərginliyin əsas səbəbi Çinin, ABŞ-ın Koreya, Yaponiya və Tayvan ilə münasibətlərini dərinləşdirməsini təhdid olaraq görməsidir.”
Xəyal Ramiz