İxtiyar yaşında öz günahı üzündən soydaşları arasında olub-qalan hörmət və nüfuzunu itirənlər başqalarının sevgisini qazana bilməzlər. Həm də ki, artıq buna vaxt qalmayıb. Daha heç kimə belə sonluq arzulamazdım.
Bu sözləri Milli Məclisin vitse-spikeri Bahar Muradova Rüstəm İbrahimbəyovun “Qafqaz üçlüyü” adlı filmi barədə münasibətini bildirərkən qeyd edib.
Bahar Muradovanın fikrincə, mənsub olduğu xalqın vicdanlı nümayəndəsi və ölkəsinin vətəndaşı ola bilməyən, olmaq istəməyən birisi dünya vətəndaşı ola bilməz: “Yalnız milli və bəşəri idealları vəhdətdə götürməyi bacaranlar çərçivələri yara və proseslərin fövqünə qalxa bilərlər. Həyat göstərdi ki, heç bir əndazəyə sığmayan hərəkətləri və sensasion açıqlamaları ilə “məşhurluq” qazanmaqla öz konyuktur maraqlarını doğma xalqının və insanlığın mənafeyinə xidmətdən üstün tutanlar mütləq şəkildə “bizim kinossenarist” Rüstəm İbrahimbəyovun aqibəti ilə üzləşəcəklər”.
