"Rusiya ilə Azərbaycan arasında bağlanan müttəfiqlik bəyannaməsi zamanında və yerində atılmış addımdır. Bu bəyannaməni tənqid edən və Prezident İlham Əliyevi günahlandıran siyasətçilər isə ən yumşaq desək haqsız və şəxsi anlamda siyasi maraqlarını önə çəkənlərdir. Bizim 90-cı illərdən bu günə qədər müxalifət olaraq ən böyük problemimiz hər şeyi inkar üzərində siyasət aparmağımız olub".
Ednews xəbər verir ki, bu sözləri millət vəkili Razi Nurullayev Milli Məclisin plenar iclası zamanı deyib. O, bildirib ki, Milli Şuranın üzvü Əli Kərimlinin Bəyannamənin Azərbaycanın müstəqilliyini ciddi şəkildə məhdudlaşdırdığı haqqında səsləndirdiyi fikirləri yanlışdır.
"Guya dünya ölkələri Rusiya ilə hesablaşmadan o qədər güclü siyasət aparıblar ki, biz qalmışdıq. Daha əlimiz-qolumuz bağlanacaq. Gülünc yanaşmadır.
Bu bəyannamə suverenliyimizə təhdid yox, özünüqoruma instinktindən yaranan, ağıllı və balanslı siyasətin nəticəsidir. Bu siyasət bizə işğalda olan əraziləri azad etməyə imkan yaratdı. Axı bir zamanlar deyirdik ki, İlham Əliyev bir qarış torpaq da ala bilməz. İnkar o zaman xeyir verir ki, həqiqəti üzə çıxarır. Bu məsələdə isə həqiqət çılpaqdır, onu aşkara çıxarmağa ehtiyac yoxdur".
Razi Nurullayev həmçinin deyib ki, məhz elə inkar üzərində qurulan siyasət nəticəsində Qarabağ işğal olundu.
"35 minə qədər şəhid vermədikmi, hələ də 4000 minə yaxın itkin düşənləri axtarmırıqmı? Rəhmətlik Əbülfəz Elçibəy də birinci səfərini Moskvaya etmişdi. Əslində, Bəyannamə ölkəmizin ərazi bütövlüyünün və suverenliyinin qorunmasına bir zəmanətdir. Biz dost Ukraynada baş verən hadisələri görmürükmü?"
Deputat Bəyannamədə Azərbaycan üçün xeyli uduşlu məqam olduğunu da vurğulayıb.
"Rusiya Qarabağda olan ermənilərə pasport və vətəndaşlıq təklif edə bilər deyə - narahat deyildikmi? Separatçılar bunun üçün çalışmırdımı, Rusiyaya birləşmək istəmirdimi? Amma Bəyannamə bu təhlükələrə nöqtə qoydu. Təsadüfi deyil ki, prezidentlərin görüşü zamanı Rusiya prezidentinin bununla bağlı bildirdiyi fikrə İlham Əliyev replika ilə cavab verdi ki, “и нерушимость границ” - həm də sərhədlərin toxunulmazlığı".
Çıxışının sonunda millət vəkili qeyd edib ki, Ermənistan hər zaman Rusiyanı Azərbaycana qarşı qoymaq istəyib.
"Heç də Rusiyanı birbaşa erməni lobbisinin və Ermənistanın ixtiyarına vermək olmaz. Bu Bəyannamədən sonra Ermənistan cəmiyyəti sanki yasa batıb. Ermənistanın siyasi partiyaları Paşinyanı istefaya dəvət edir. Onlar hesab edirlər ki, Rusiya ilə Azərbaycan arasında müttəfiqlik sazişinin imzalanması artıq Ermənistanın bütün planlarına son qoymuş olur. Artıq Ermənistanın Rusiya kartı ilə Azərbaycana təzyiq göstərmək imkanı əlindən çıxmış oldu.
Yuxarıda dediklərimə istinadən gəlin həqiqətləri inkar üzərində müxalifətçilik etməyək. Müxalifətçilik etməli o qədər məsələlər var ki, onu da edirik".
Vüsalə Balayeva