Hər bir millətin tarixində dönüş nöqtəsi və bunu yaradan liderlər olur. Azərbaycan üçün belə önəmli günlərdən biri 15 İyun – Milli Qurtuluş Günüdür. Bu tarixi yaradan isə Azərbaycanın müstəqilliyinin qorunub saxlanmasında, möhkəmlənməsində, inkişafında müstəsna rol oynayan Umummilli lider Heydər Əliyevdir.
Azərbaycanın keçmiş Xarici İşlər naziri Tofiq Zülfüqarov Ulu Öndərlə bağlı xatirələrini Ednews-la bölüşüb. Siyasi şərhçi söhbətə Ümummilli liderlə ilk tanışlığından başlayıb. T. Zülfüqarov o günü belə xatırlayır:
“Heydər Əliyevlə ilk tanışlığım 1993-cü ilin iyul ayına təsadüf edir. O vaxt keçmiş nazir Tofiq Qasımov öz fəaliyyətini dayandırmışdı və Romada Minsk Qrupunun ilk danışıqlarında mən iştirak edirdim. Bu məsələ ilə əlaqədar məruzə etmək üçün məni Milli Məclisin binasında keçirilən iclasa çağırmışdılar. O zamanlar Heydər Əliyevin rəsmi vəzifəsi Milli Məclisin sədri idi. Hökumətin digər üzvləri də orada idi. Axşam təxminən saat 11-də ona məruzə etdim, təlimatlar aldım, yenə də danışıqlarda iştirak etdik”.
O, rəhbər üçün vacib xüsusiyyətlərin hər birinin Heydər Əliyevdə olduğunu vurğulayıb. Onun sözlərinə görə, ən təsirlisi isə onun iş üslubu idi.
“İclasda bu və ya digər sahəyə, o cümlədən xarici siyasətə aid mütəxəssislər dəvət olunur, mövzu barədə məruzələr edilir, suallar verilir, müzakirələrdə müxtəlif arqumentlər səslənirdi. Bu, adətən bir saat, bəzən isə saatlarla davam edirdi. Sonda Heydər Əliyev qərar qəbul edirdi və o qədər aydın və real təlimatlar verirdi ki, onun icrası rahat olurdu. Heydər Əliyevin daha bir böyük xüsusiyyəti isə daim onunla işləyən insanların rəy və mövqeyini soruşması və onlara təmkinlə qulaq asması idi”.
Tofiq Zülfüqarovun sözlərinə görə, onun hadisələrə sistemli baxışı vardı.
“O, hadisələri tərkib hissələrə bölünmüş şəkildə təhlil edib bizimlə müzakirə edirdi. Bu çox vacib idi, çünki problemi daha yaxşı görmək üçün onu struktur əsasında təhlil etmək lazımdır”.
Politoloq Heydər Əliyevlə bir çox xarici səfərlərdə olduğunu da bildirib. O, qeyd edib ki, nazir müavini olarkən və ondan öncə nümayəndə heyətinin üzvü kimi Ulu Öndərlə müxtəlif görüşlərdə yaxından iştirak edib.
“O, Azərbaycan və onun problemlərini xarici dövlət başçılarına və ya digər vəzifəli şəxslərə struktur əsasında elə çatdırırdı ki, hər bir şey təbii və aydın alınırdı. O, Qarabağ münaqişəsi haqqında danışanda hər zaman əraziləri dəqiqliklə xəritədə göstərirdi. Xarici nümayəndənin söhbət nəticəsində çəkilən müxtəlif adlar yadından çıxa bilərdi, amma xəritə üzərində işğal olunmuş ərazilər, didərgin düşmüş insanların sayı ilə bizim problemlər əyani şəkildə təqdim olunurdu. Bu da diplomatiyanın ən yüksək səviyyədə olduğunu göstərirdi. Dəfələrlə xarici qonaqların ona rəğbətlə yanaşmalarını görmüşəm, bu da həm onun şəxsiyyətinə, həm də dövlətə və onun problemlərinə müsbət münasibət yaradırdı”.
Tofiq Zülfüqarov vurğulayıb ki, Qarabağ münaqişəsinin həlli üçün baza da məhz Heydər Əliyevin dövründə formalaşıb.
“O zaman Azərbaycan informasiya blokadasında idi. Ermənilər bütün dünyaya münaqişə və onun nəticələri barədə məlumatları təhrif olunmuş şəkildə yayırdı. Hətta ərazilərimizin işğalı zamanı ABŞ bizə qarşı sanksiya tətbiq etmişdi. Təəssüflər olsun ki, Heydər Əliyevin gəlişindən öncə bizim real problemlər, ümumiyyətlə vəziyyət barədə məlumat yox idi. Cənab Prezident hər bir səfərində, qonaqlarla görüşlərində daim Azərbaycanın mövqeyini təqdim edirdi”.
Sonda Tofiq Zülfüqarov:
“Vətən müharibəsi zamanı da heç kimin şübhəsi yox idi ki, Azərbaycan öz ərazilərini işğalçıdan azad edir. Biz indi Ukrayna hadisələrindən görürük ki, informasiya müharibəsi real müharibədən daha vacibdir. O vaxt yaradılan siyasi propoqandanın bünövrəsi bizə 2020-ci ildə müharibədə zəfər çalmağa imkan verdi”.
Gülnar Səlimova