Rusiyada elan olunan səfərbərlik əhali arasında əks təsir yaradıb. Səfərbərlik qorxusu ilə Rusiyada yaşayan imkanlı və xüsusilə cavan təbəqə ölkəni tərk edir.
Hazırda ruslar daha çox Türkiyə, Azərbaycan, BƏƏ və Orta Asiya ölkələrinə axın etməyə başlayıb. Bir çox ekspertlərə görə bu ölkələrdə yarana biləcək demoqrafik və hətta iqtisadi problemlərlə izah olunur.
İqtisadçı ekspert Eldəniz Əmirovun Ednews-a verdiyi açıqlamasına görə bu gərginlik Azərbaycan və Türkiyədə də yarana bilər.
“Rusiyadakı səfərlikdən dolayı Rusiya əhalisinin bir hissəsinin Türkiyə və Azərbaycana axın etməsinin təbii olaraq hər iki ölkəyə müəyyən təsiri olacaq. Lakin mən hesab edirəm ki, Türkiyə və Azərbaycana olan təsirlər eyni ola bilməz. Türkiyədə belə bir qanun var ki, orada əmlaka qoyulan vəsaitlə həm də vətəndaşlıq əldə etmək olur. Məsələn, qiyməti 250 min dollar olan mənzili aldıqda və ya 500 min dollar yatırım etdikdə avtomatik olaraq Türkiyədə vətəndaşı olmaq mümkündür”.
Ekspert əlavə edib ki, bu və ya digər qaydalar Azərbaycanda fərqli olduğundan Türkiyəyə və Qazaxıstana axın daha böyük ola bilər.
“Türkiyənin iqtisadiyyatı Azərbaycanla müqayisə edilə bilməz, həmçinin faktiki olaraq sərhədlərimiz də hələki bağlıdır. Hesab edirəm mövcud olan şəraitə görə Rusiya vətəndaşları daha çox Türkiyə və Qazaxıstanı seçməli olacaq. Həm də Qazaxıstan quru sərhədləri Türkiyə kimi açıqdır və hazırda ora bir çox Azərbaycan vətəndaşları da üz tutmaqdadır”.
Eldəniz Əmirov baş verənlərin fonunda quru sərhədlərin açılmasının müsbət və mənfi tərəflərinə də toxunub.
“Sərhədlərin bağlanması ilə bağlı məncə Azərbaycan hökuməti hadisələri daha doğru proqnoz edə bilib. Baxmayaraq ki, Azərbaycandan başqa bir çox ölkələr quru sərhədlərini artıq açıb. Sadəcə bir şeyi əlavə etmək istərdim ki, quru sərhədlərin açılmasının bir müsbət tərəfi də xaricdə yaşayan azərbaycanlıların vətənə qayıtması üçün əlverişli olmasıdır. Məncə, Rusiya və digər ölkələrdən vətənə qayıtmaq istəyən həmvətənlərimizin istəyini nəzərə alaraq quru sərhədlərin açılmasını mən üstün hesab edərdim”.
Elnur Ənvəroğlu