Siyasətçilərdən narazlıq, etirazlar heç də hər zaman sözlə ifadə olunmur. Bəzən narazı şəxslər öz etirazlarını nümayiş etirmək üçün siyasilərə hücum etmək taktikasını seçirlər. Maraqlıdır ki, bir sıra böyük dövlətlərin başçıları vəzifədə olduqları vaxtlarda vətəndaşların hücumunun hədəfinə çevriliblər.
Ednews Bizim.Media-ya istinadən xəbər verir ki, sıravi vətəndaşlar tərəfindən hücuma məruz qalmış dövlət başçılarını araşdırıb.
Emmanuel Makron
Yəqin ki, ilk pilləyə Fransa prezidentinin adını yazmaq daha doğru olardı. Çünki Makron digərlərindən fərqli olaraq bir neçə dəfə vətəndaşlar tərəfindən hücuma məruz qalıb. Son olaraq bir neçə gün öncə, vətəndaşları salamlayan Fransa prezidenti kütlənin içərisindəki bir qadın tərəfindən sillələnib.
Makron daha əvvəl ötən ilin iyununda oxşar vəziyyətlə qarşılaşmışdı. Hadisə ölkənin cənub-şərqindəki Drom departamentinə səfər zamanı baş verib. Makron dəmir hasarın yanında dayanan yerli sakinlərlə söhbət etmək üçün yuxarı qalxıb. Prezident əlini maskalı qalın qara saqqallı şəxsə uzadıb. Cavabında həmin şəxs tərəfindən sillələnən Makronu mühafizəçiləri ərazidən uzaqlaşdırıb.
Bu hücumlarla bağlı açıqlama verən Makron baş verənlərə rəğmən vətəndaşlarla birbaşa ünsiyyətdə olmağa davam edəcəyini elan edib.
Corc Buş
2000-2008-ci illərdə ABŞ-a rəhbərlik etmiş oğul Buşun başına gələnlər də yəqin ki, oxuyucuların yaddaşındadır. Hadisə hələ də “Buşun ayaqqabısı” adı ilə xatırlanır. Belə ki, 2008-ci ildə Buş və İraqın baş naziri Nuri Malikinin birgə mətbuat konfransı zamanı bir jurnalist qəflətən oturduğu yerdən ayağa qalxaraq “Bu, iraqlıların hədiyyəsidir. Bu vida öpüşüdür, sən itsən”, - deyərək Amerika prezidentinə ayaqqabı atıb. Hadisə bununla bitməyib: birinci atışdan dərhal sonra jurnalist əyilib, ikinci ayaqqabını götürüb və eyni şəkildə ABŞ liderini yenidən hədəf alıb. Buş hər iki ayaqqabıdan uğurla yayınmağı bacarıb.
Yen Jiabao
Maraqlıdır ki, Çinin baş naziri də Buşun hadisəsindən sonra trendə çevrilən ayaqqabı hücumunun qurbanlarındadır. Belə ki, Buşa atılan ayaqqabıdan bir il sonra Kembric Universitetinin aspirantı Martin Yanke universitetdə çıxış edən Çinin baş naziri Wen Jiabaoya ayaqqabı atıb. Çinli hökumət adamına atılan ayaqqabı da Corc Buşla olduğu kimi hədəfinə çatmayıb.
Vladimir Putin
2013-cü ildə Rusiya prezidenti Vladimir Putin qarşısında sinəsini açan ukraynalı fəallara baxmaq məcburiyyətində qalıb. Bir neçə qadın fəal tez soyunaraq Rusiya liderinin ünvanına təhqiramiz sözlər deməyə başlayıblar. Tezliklə onlar mühafizəçilər tərəfindən zərərsizləşdirilib.
Hadisə Putin və Almaniya kansleri Angela Merkelin "Volkswagen" sərgi stendini ziyarət edərkən baş verib.
Sonradan həmin beş nəfərə qarşı cinayət işi də açılıb. Maraqlıdır ki, Putin hadisə ilə bağlı danışarkən, hücumun olacağından əvvəlcədən xəbərdar olduğunu və baş verənlərin xoşuna gəldiyini bildirib.
Jak Şirak
Fransanın sabiq prezidentinə qarşı hücum isə daha təhlükəli olub. Hadisə 2002-ci ildə Bastiliya Günü münasibətilə keçirilən tədbirdə baş verib. Belə ki, 27 yaşlı Maksim Bruner gitara çantasında gizlətdiyi tüfəngdən prezidentə atəş açıb, lakin hədəfdən yayınıb. Doğrudur, məhkəmə ekspertizası Brunerin psixi problemlərdən əziyyət çəkdiyini təsdiqləyib. Buna baxmayaraq, prezidentə hücum edən gənc 10 il həbs cəzasından yaxa qurtara bilməyib.
Silvio Berluskoni
İtaliyanın baş naziri Silvio Berluskoni 2009-cu ildə rəhbəri olduğu partiyanın mitinqindən sonra Milanın mərkəzində insanlarla avtoqraf verir və söhbət edirdi. Baş nazirin üzünə qəflətən ağır bir suvenir atıldıqda isə 73 yaşlı siyasətçi hadisəyə reaksiya belə verə bilməyi. Əvvəlcə 40 yaşlı naməlum şəxsin hökumət başçısının üzünə yumruq vurduğu bildirilsə də, sonradan baş nazirə əşya atıldığı məlum olub. Berluskoni iki dişsiz və burnu qırılmış vəziyyətdə xəstəxanaya çatdırılıb.
Gerhard Şröder
Almaniya kansleri Gerhard Şröder 2004-cü ilin mayında Avropa Parlamentinə seçkilər üçün kampaniya apardığı Manheim şəhərinin mərkəzində idi. Kansler avtoqraf verərkən 52 yaşlı yerli sakin Şröderin üzünə sillə vurub. O, demək olar ki, dərhal hüquq-mühafizə orqanlarının əməkdaşları tərəfindən tutulub. Mətbuat isə həbsi üçün heç bir əsas tapmadıqları üçün həmin şəxsin sərbəst buraxıldığını yazıb. Maraqlıdır ki, hadisədən sonra Şröder heç nə olmamış kimi çıxışına davam edib.
