Ermənistan Laçın dəhlizinin bağlanması ilə bağlı Avropa İnsan Hüquqları Məhkəməsinə müraciət edib.
Avropa məhkəməsində Azərbaycana qarşı ittiham irəli sürüləcəyi və ya sürülməyəcəyini aydınlaşdırmaq üçün Ednews hüquqşünas Əsabəli Mustafayevdən şərh alıb.
Əsabəli Mustafayev qeyd edib ki, Ermənistan müəyyən hüquq prosedurları çərçivəsində məsələ ilə bağlı Avropa məhkəməsinə müraciət edə bilər.
“Ermənistan hakimiyyəti Avropa məhkəməsinin 39-cu reqlamentinə uyğun olaraq Laçın dəhlizinin bağlanması ilə bağlı Avropa İnsan Hüquqları Məhkəməsinə müraciət edə bilər. Amma bir məsələni nəzərə almaq lazımdır ki, 39-cu reqlament əsasən işğəncə hallarında tətbiq edilir. Düzdür, Ermənistan rəsmiləri məhkəmədə deyə bilərlər ki, dəhlizinin bağlanması sülhməramlıların nəzarəti olan ərazilərimizdə kommunal və tibii xidmətlərin məhdudluğuna, ərzaq çatışmamazlığına və təhlükəli halların artmasına gətirib çıxarır. Lakin hesab etmirəm ki, Avropa məhkəməsi Azərbaycan qarşı hüquqi ittiham irəli sürsün. Yəqin ki, Azərbaycan hökumətinə soğru göndərəcəklər, hökumətimiz də həmin sorğunu cavablandıracaq. Eyni zamanda ermənilər müraciət etsələr də məhkəmədə proses uzun çəkəcək. Həmin müddət ərzində tərəflərin razılığı əsasında Qarabağda problemlər həll edilə bilər. Prosesin nəticəsini indidən demək çətindir.
Bununla bərabər, Avropa məhkəməsi çox yaxşı bilir ki, dəhlizin yerləşdiyi bölgədə müəyyən mənada hərbi toqquşmalar riski var”.
Qeyd edək ki, Rusiya sülhməramlılarının müvəqqəti nəzarətində olan ərazilərdə faydalı qazıntı yataqlarına, xüsusilə Qızılbulaq qızıl və Dəmirli mis-molibden yataqlarının qanunsuz istismarına etiraz olaraq eko-fəallar və QHT təmsilçiləri Şuşa-Laçın yolunda aksiyanı davam etdirir.
Yunis Abdullayev