İranda molla rejiminə qarşı etirazlar, aksiyalar davam etməkdədir. Rejimə qarşı sanksiyaların tətbiqi də davam etdirilir.
Güney Azərbaycan Milli Müqavimət Cəbhəsi Cənubi Azərbaycanın bütün şəhərlərində divarlara posterlər yapışdırmağa başlayıb. Şair, Azərbaycan Yazıçılar Birliyinin Güney Azərbaycan Şöbəsinin rəhbəri Sayman Aruzun Ednews-a verdiyi açıqlamaya görə, etirazçılar İran dövlətinə son fürsəti verib.
“Azərbaycan dili, Urmiya gölünün qurudulması və s. məsələlərlə bağlı. Əgər son fürsətdə İran dövləti Azərbaycan xalqının maraqlarını təmin etməsə, Cənubi Azərbaycanda kütləvi şəkildə etirazlara start veriləcək”.
İranşünas mütəxəssis Vidadi Mustafayev isə bildirdi ki, etirazların müsbət nəticə verməsi üçün müxalifət qüvvələri birləşməli idi.
“Yalnız posterlə hökumətə təsir etmək mümkün deyil. Güneylilər bu prosesdə zəif iştirak edirlər. Çox iş görmək lazımdır. Aylardır ki, insanlar küçələrdə etirazlar edirlər, nəyəsə nail ola bilmirlər. Bir posterlə nəyəsə nail olunacağına inanmıram. Amma hər halda, Cənubi Azərbaycanda baş verən istənilən milli hərəkata dəstək vermək lazımdır. Əsas dəstəkdir. İranda farslarla azərbaycanlıların dialoqu tutmadı. Etirazların müsbət nəticə verməsi üçün müxalifət qüvvələri birləşməli idi. Milli məsələdə onlar birləşmədi. Milli azlıqların tələbləri, ehtiyacları nəzərə alınmır. Ona görə milli rayonlar bir tələb irəli sürürlər, mərkəzi rayonlar isə başqa tələb irəli sürürlər. Zahirən spontan bir şey görünür. Yenə deyirəm cənubi azərbaycanlıların fəaliyyəti heç görünmür. Təbrizdə, Ərdəbildə bir-iki dəfə etiraz aksiyası oldu. Əgər İran mediasına inansaq, hazırda orada tam sakitlikdir”.
Ekspert İranda son günlər baş verənləri ümumi belə səciyyələndirib:
“Dövlət mediasında etirazlar bitib, ancaq həbs olunanlardan, məhkəmələrdən danışırlar. Amma xarici mediada etirazlar hələ də davam edir. Bu ikisini birləşdirəndə inqilabın bitdiyini demək olmur. Zəifdir, amma davam edir”.
Oğuz Ayvaz