Xəbər verdiyimiz kimi bu gün Azərbaycanın İrandakı səfirliyinə hücum olub.  “Kalaşnikov” avtomatı ilə silahlanmış şəxs Azərbaycanın İrandakı səfirliyinə hücum edib. Nəticədə səfirliyin təhlükəsizlik xidmətinin rəisi öldürülüb, daha iki əməkdaş yaralanıb. 

“Səfirliyə olan hücumla bağlı təhlillər göstərir ki, bu  bütövlükdə İranın daxilindən qaynaqlanan prossesin nəticəsidir.  Bizi bu qənaətə gəlməyə vadar edən bir sıra yanaşmalar var”

Bu sözləri sözügedən məsələ ilə bağlı  Ednews-a açıqlamasında siyasi şərhçi Əziz Əlibəyli bildirib.   

“İlkin informasiya ondan ibarətdir ki, qatil  səfirliyə  iki azyaşlı uşağı ilə üzərində “Kalaşnikov” avtomatı yaxınlaşıb. Maraqlıdır ki, bunu  orada  hüquq mühafizə orqanları  görməyib. Azərbaycanla İran arasında olan münasibətlər həssas dönəmdən keçir. Burada təhlükəsizlik məsələsi aktualdır”. 

O həmçinin qeyd edib ki, İran  tərəfindən tirajlanan xəbərlər kifayət qədər gülməlidir.  

“Qatilin  səfirlikdə gizlənən həyat yoldaşını axtarması nə deməkdir?  Bir şəxs avtomatla səfirlikdə gizlənən həyat yoldaşını axtarır. Bu nə hekayədir, yanaşmadır? ”

Politoloq qatilin erməni əsilli olması ilə bağlı yayılan xəbərlərə aydınlıq gətirib. 

“Qatilin erməni olması ilə bağlı yayılan xəbər saxta məlumat da ola bilər. Belə  məlumatlar bizi yanlış nəticələr çıxarmağımız üçün ortaya  atılan informasiyadır.  Görüntülər göstərir ki, qatilin məqsədi avtomat silahla səfirliyə daxil olu, bütün səfirlik əməkdaşlarını güllələmək  olub. Bir halda ki, bir şəxsə maneəsiz şəkildə səfirliyə daxil olub oradakı mühafizəçiləri qətlə yetirə biləcək qədər hərəkət trayektoriası verilirsə,  bizim bu məsələdə SEPAH-dan və İranın  hüquq-mühafizə orqanlarından şübhələnməyə  əsas verir”.

Qeyd edək ki, bu prosses Azərbaycan və İranın Xarici İşlər Nazirlilərinin iki ölkə arasındakı münasibətlərinin  normallaşdırılması ilə bağlı danışıqlarından sonra başlayıb. 

Ayan Rzayeva