Rusiya xarici işlər naziri Sergey Lavrov Azərbaycana səfər edəcək.
Bu barədə Rusiya Xarici İşlər Nazirliyinin sözçüsü Mariya Zaxarova həftəlik brifinqdə deyib. Bundan başqa Nazirliyin sözçüsü Rusiyanın sülh müqaviləsi ilə bağlı Bakı və İrəvana yardım etdiyini də qeyd edib.
"Moskvada Azərbaycan və Ermənistan Xarici İşlər nazirlərinin növbəti görüşünü təşkil etməyə hazır olduğumuzu təsdiq edə bilərəm”, - deyə Rusiya XİN nümayəndəsi qeyd edib.
Xatırladaq ki, iki gün öncə Azərbaycan Prezidenti İlham Əliyev Rusiya Xarici İşlər nazirinin Azərbaycan-Ermənistan münasibətlərinin normallaşması üzrə xüsusi nümayəndəsi İqor Xovayevi qəbul etmişdi.
Görüş zamanı Azərbaycan və Ermənistan arasında münasibətlərin normallaşdırılması, sülh müqaviləsinin hazırlanması üzrə danışıqlar prosesi müzakirə olunub. Xovayevin səfərinin detalları məlum olmasa da, Sergey Lavrovun Azərbaycana gəlişi həmin müzakirələrin daha yüksək səviyyədə davamı hesab oluna bilər. Xovayev fevralın 9-da İrəvana səfər edib. Fevralın 11-də isə Ermənistan və Rusiya Xarici İşlər nazirləri arasında telefon danışığı olub.
Səfərin təfərüatları ilə bağlı Ednews-a danışan politoloq Zərdüşt Əlizadə Qarabağ məsələsinin görüşdə əsas müzakirə mövsuzu olacağını bildirib:
“Ikili münasibətlər, siyasi-iqtisadi məsələlər müzakirə ediləcək. Bundan başqa danışıqların mərkəzində Qarabağ məsələsi olacaq. Mövqelərin uzlaşdırılmasına çalışılacaq. Ancaq uzlaşma olub-olmayacağını bir Allah bilir. İki tərəfin də Qarabağla bağlı fikirləri fərqlidir. Biz istəyirik məsələsə həll olunsun sülh bağlansın. Rusiya isə bu məsələnin daha da uzanmasını istəyir. Rusiya hazırda Qarabağda separatçı rejimlə dostluq eləyir. Buna görə dəonun əvvəlki kimi imkanları yoxdur. Azərbaycan imkanları genişlənib və güclənib. Unutmaq olmaz ki, Rusiya ilə Azərbaycan arasında təkcə Qarabağ məsələsi yox, nəhəng kənd təsərrüfatı əlaqələri də var. Buna görə Azərbaycanın Rusiya kimi böyük bir bazara hər zaman ehtiyacı var”.
Əbülfət Baxşəli