Xəbər verdiyimiz kimi, Rusiya Prezidenti Vladimir Putinin Federal Məclisə müraciəti, ardınca ABŞ Prezidenti Co Baydenin Polşadakı çıxışı müharibənin gedişatı ilə bağlı gərgin müzakirələrə səbəb olub. Baş verən son siyasi proseslər, hegemon dövlətlərin liderlərinin çıxışları Üçüncü Dünya müharibəsi ehtimalını yenidən gündəmə gətirib.
Mövzu ilə bağlı Ednews-a şərh verən politoloq Tofiq Abbasov bildirib ki, dünyada hazırkı vəziyyət elə müharibə şəraitidir.
“Gərgin münaqişə bölgələri var. Ukrayna-Rusiya müharibəsi də öz yerində. Onların ətrafında da ölkələr necə formalaşır, qruplaşır və səfərbər olurlar, müşahidə edirik. Münhen Təhlükəsizlik konfransında bir təhlükləli cərəyanın şahidi olduq. Kollektiv Qərb sözün əsl mənasında Rusiyanı təkləməyə cəhdlər göstərir və bunun üçün də Ukraynanı silahlarla təchiz etməyə çağırır. Əgər belə gedirsə biz, həm də bu münaqişə ətrafında beynəlmilləşmə prosesini görürük. Sayca artan ölkələrin iştirakı göz önündədir. Əgər bu III Dünya Müharibəsinin göstəricisi deyilsə bəs nəyin göstəricisidir?”
Siyasi şərhçi qeyd etdi ki, Azərbaycan münaqişəli vəziyyətini öz gücünə arxalanaraq həll etdi. Bu zəmində də çoxsaylı cəhdlər göstərilir ki, yenidən gərginlik Cənubi Qafqaza gəlsin. Ermənistana süni nəfəs verilsin.
“İqtisadi zəmində dünyanın yeni formatı artıq işlənilir. Qərb ölkələri, xüsusilə ABŞ başda olmaqla maliyyə, əmtəə, enerji, qida bazarlarını çökdürməklə məşğuldurlar. Onlar çalışırlar ki, bütün səhmlərin hamısının dəyərini vurub yerə sərsinlər, azaltsınlar. Sonra yenidən formalaşdırıb özləri daha üstün vəziyyətdə olsunlar. Geosiyasi və hərbi texniki sahədə də bəhs etdiyim cərəyan qüvvəyə keçir”.
T.Abbason əlavə etdi ki, Prezident İlham Əliyev dəfələrlə qatıldığı mötəbər tədbirlərdə çıxış edirdi ki, dünya nizamı işləmir, biz elə bilirdik ki, Qarabağ məsələsinə görə dünya birliyi bizə kömək edəcək, Ermənistana sanksiya tətbiq edəcək, ancaq bu baş vermədi.
“Baş verən siyasi proseslərin fonunda böyük məsuliyyətsizlik görürürk. Fövqəl qüvvələrin yenidən liderlik uğrunda gərgin, azğın mübarizəsinin şahidi oluruq. Belə olduğu halda kiçik dövlətlər yalnız özlərinə güvənib mövqelərini qorumaqda mətinlik göstərsinlər. Bunun başqa yolu yoxdur”.
Oğuz Ayvaz