“Dövlət departamentinin mətbuat katibi Ned Praysın şərhinə hansısa əlavələr etməyə gərək yoxdur. İran istər Əsəd rejimini dəstəklədiyi Suriyada, istərsə də Ukraynada Rusiyanı əraziləri, infrastrukturları, məhv etmək və mülki insanları öldürmək üçün pilotsuz təyyarələr və ballistik raketlərlə belə təmin edir”.
Bu sözləri Ednews-a ABŞ-ın Azərbaycandakı keçmiş səfiri Metyu Brayza ABŞ Dövlət Departamentinin martın 11- də İran İslam Respublikasına məxsus hərbi təyyarənin Azərbaycan-İran dövlət sərhədi boyunca uçuş həyata keçirməsinə münasibətini şərh edərkən bildirib.
Keçmiş səfirin sözlərinə görə, İran uzun müddətdir ki, bütün dünyada terror qruplaşmalarını himayə edir və onlara köməklik göstərir.
“Düşünürəm ki, dövlət departamenti İranın Azərbaycanla sərhədinə bu qədər yaxından hərbi uçuşu kimi təxribatçı addımlar fonunda Cənubi Qafqazın sabitliyini təmin etmək üçün həm Azərbaycan, həm də Ermənistanla əlaqələri vurğulamaq niyyətindədir. İranın keçən il Azərbaycanla sərhədinə doğru hərbi hərəkətlərindən də belə görünür ki, Dövlət Departamenti və Bayden administrasiyası İranın Cənubi Qafqazda aqressivliyinin qarşısını almaqla yanaşı, həm də təxribatçı və bədxah fəaliyyətlərini qeyd etmiş olub”.
Qeyd edək ki, ABŞ Dövlət Departamenti İran İslam Respublikasına məxsus hərbi təyyarənin martın 11- də Azərbaycan-İran dövlət sərhədi boyunca uçuş həyata keçirməsinə münasibət bildirib.
Bu barədə qurumun mətbuat xidmətinin rəhbəri Ned Prays keçirdiyi mətbuat konfransında danışıb.
O qeyd edib ki, İran uzun müddətdir ki, regionda pis niyyətli oyunçu olub:
“Azərbaycan və İrana gəlincə, təbii ki, İran uzun müddətdir ki, regionda pis niyyətli oyunçudur. O, həm yaxın, həm də uzaq qonşularını təhdid edən zərərli işlərlə məşğul olur. Ona görə də biz bu tip gərginlikləri narahatlıqla izləyirik.
Bizim yanaşmamız ondan ibarətdir ki, bir az əvvəl çox fərqli kontekstdə dediyimiz kimi, Cənubi Qafqazda Azərbaycanla, Ermənistanla əlaqələrimizə sərmayə qoymaqdan ibarətdir ki, daha sabit, münaqişəyə və gərginliyə daha az meylli Cənubi Qafqaz regionuna nail olaq”.
Ülviyyə Şahin