“Rusiyada baş verənlər qiyamdır. Əgər bir hərbi hissənin komandiri Müdafiə Nazirliyinə qarşı qalxırsa və onun rəhbərliyini devirməyə çalışırsa, bu qiyamdır, başqa şey demək mümkün deyil”.
Bu sözləri Ednews-a politoloq Zərdüşt Əlizadə Rusiyada baş verən hadisələrlə bağlı fikir bildirərkən deyib.
“Baş verənlər Putinin hakimiyyətini laxlatdı, xeyli zəiflətdi. Ola bilsin ki, devrilməsin, amma hakimiyyəti zəiflədi, legitimliyi şübhə altına alındı, əhali arasında onun müdrikliyinə olan inam xeyli sarsıldı. Bəlkə də devriləcək, ya yox, amma danılmaz fakt budur ki, bu qiyam nəticəsində hakimiyyəti xeyli zəiflədi.
Priqojinə heç bir kənar dəstək yoxdur, yalnız içəridədir. Priqojin bir cinayətkar rejimin tərkib hissəsidir. Oliqarxdır, Putinin yaxın adamıdır, bütün bu quruluş canilərdən ibarətdir. Orada cani olmayan yoxdur, hamısı canidir, Priqojin də onlardan biridir. Sadəcə Rusiyada hakimiyyətin bölüşdürülməsi məsələsində ciddi narazılıq yaranıb. Putin vaxtilə hakimiyyətə gedən yolunu açmaq üçün Sankt-Peterburqun qubernatorunu devirməyə çalışmışdı. İndi də Priqojin Şoyqu və Gerasimova bunu edir”.
Z.Əlizadə sonda qeyd etdi ki, cəbhə dönəmində də Azərbaycanda belə olaylar baş vermişdi:
“Hakimiyyətin yuxarı pillələrində nümayəndələr arasında ciddi qarşıdurmalar gedirdi, bir-birini aşırmağa çalışırdılar. İndi də Rusiyada. Putin baş verənlərin önünü ala, bir qərar verə bilmir. Nə Ukrayna ilə müharibəyə son qoya, nə Qərblə münasibətləri tənzimləyə, nə də iqtisadiyyatı dərin böhrandan çıxara bilir”.
Oğuz