Ermənistanda hakimiyyət dəyişikliyi ola biləcəyi ilə bağlı xəbərlər dolaşır. Paşinyan administrasiyasındakı fikir ayrılıqları və etirazlar fonunda sözügedən iddialar daha da artır. Alen Simonyanın Paşinyanın yerinə ən iddialı namizəd olduğu deyilir. Bəs həqiqətən Simonyan Paşinyanı əvəzləyə bilərmi?
Mövzu ilə bağlı Ednews-a açıqlamasında politoloq Natiq Miri bildirdi ki, Paşinyanın siyasi komandasında parçalanma fikri yaratmaq - bu düşünülmüş məsələdir:
“Bununla da olmayan bir şeyi olar kimi göstərməklə erməni ictimaiyyətində Paşinyan komandasının zəyifliyi və parçalandığı və kiçik bir müqavimətlə hakimiyyətin devrilə biləcəyi görüntüsü yaratmaq istəyirlər. Buna inam yarandığı təqdirdə insanlar küçəyə çıxa və bu hakimiyyəti devirə bilərlər. Ona görə zaman-zaman belə bir fikir yaradılır: istər Rusiyayönlü 5-ci kalon, eyni zamanda Qarabağ klanına xidmət edən media qurumları xüsusi olaraq bu məsələ ilə bağlı canfəşanlıq edirlər. O ki, qaldı Alen Simonyan, Qriqoryan kimi şəxsələrə - onlar erməni ictimai rəyində populyar, nüfuzlu şəxslər deyil. Erməni əhalisi seçki olduğu təqdirdə onlara heç bir faiz də səs verməz. Simonyanlar Paşinyanın kölgəsində Simonyan kimi görsənir. Paşinyansız onlar heç kimdirlər. Ona görə də onları lider kimi cəmiyyətə təqdim etmək aldadıcı və ictimai rəyi çaşdırmağa yönəlib. Çünki erməni ictimai rəyində Simonyan, Qriqoryanların siyasi faktoru yoxdur. Onların ciddiliyi qəbul edilə bilməz”.
Ermənistan müdafiə nazirinin keçmiş müavini Artak Zakaryan deyib ki, Paşinyanın yanlış siyasəti Azərbaycanla müharibəyə səbəb olacaq: “Ermənistanı yeni itkilər və faciələr gözləyir. Müharibənin baş verəcəyi coğrafiya Zəngəzur - mövzu dəhlizdir”.
Bu fikirlərə də münasibət bildirən N.Miri qeyd etdi ki, Zakaryanın açıqlaması erməni ictimai rəyində xüsusilə də hakimiyyətdən narazı qalan və Rusiyanın əks kəşfiyyat idarəsi ilə hərbi əks kəşfiyyat idarəsi bilavasitə onlarla əlaqəli olan generallar, zabitlər hər zaman bu yöndə açıqlamalar verir:
“Azərbaycan Zəngəzur dəhlizini hərbi yolla açmaq istəyini heç bir zaman bildirməyib. Belə bir plan yoxdur. Bunlar hamısı sadəcə erməni əhalisini qorxutmaq və az da olsa Paşinyana olan inamı sarsıtmağa yönəlib. Belə bir ictimai fikir formalaşdırmaq istəyirlər ki, Qarabağ itirilib əldən gedib, növbə Ermənistandır. Satqın Paşinyan tədricən Ermənistanı yavaş-yavaş Azərbaycana və Türkiyəyə təslim edəcək. Beş ildən artıqdır ki, bu revanşist, narazı qüvvələr bu cür fikirlərlə oynayır. Ancaq alternativ nə təklif edirlər? İndiki çətin, qeyri-müəyyən bir vəziyyətdə Paşinyanın hökumətini əvəzləyən siyasi qüvvələr kimlərdir və nə təklif edirlər? Ermənistanın mövcud problemini necə həll edəcəklər? Zərrə qədər bir yol göstərən nə siyasi baş, nə də komanda yoxdur. Hər kəs satqınlıqdan, xəyanətdən danışır. Lakin Ermənistanı gələcəyə aparan yolu göstərən kimsə yoxdur”.
Oğuz