ABŞ höküməti İranın hücumuna qarşı İsrailə hərbi qüvvələr yerləşdirməyi planlaşdırır. İranın potensial hücumunu dəf etmək üçün Yaxın Şərqə hərbi nəzarəti artırmağı düşünən Vaşinqton, digər tərəfdən də müharibənin kontrol altına alınmalı olduğunu bildirib. 

ABŞ-ın məsələyə birbaşa daxil olması nə ilə nəticələnə bilər?

Məsələ ilə bağlı Ednews-a danışan siyasi ekspet Xəlil Əl-Asali, Yaxın Şərqdə tezliklə regional müharibə başlayacağını açıqlayıb:

“Öncəliklə düşünürəm ki, Amerika İsrailə hərbi qüvvələri yerləşdirməyi daha yaxşı düşünməli və bunu planlaşdırmalıdır. Çünki, onların hərbi gəmiləri və orduları onsuz da İsraildədir. Beləliklə, burada yeni heç nə yoxdur, çünki ABŞ onsuz da müharibənin bir parçasıdır. Bundan əlavə isə, bu addım İrana ünvanlanmış bir mesajdır. Onlar bununla demək istəyirlər ki, İranın İsrailə qarşı atacağı hər hansı bir addıma cavab veriləcək. Bu İsrailin fundamental təhlükəsizlik meyarlarından biridir.”

Ekspert bildirib ki, İsrailin ən ciddi problemləri xaricdə yox, ölkənin daxilində və eləcə də ordudadır:

“Düşünürəm ki, müharibə bundan sonra daha da qəddar və regional hal alacaq. Bu konflikt sadəcə İsrail və İran arasında deyil. İsrailin daxilində çox ciddi problemlər var. Ordu üzvləri belə yenidə döyüşlərdə iştirak etmək istəmədiklərini bildiriblər. Netanyahunun açıq şəkildə bir planı var: müharibəyə davam edib onu regional münaqişəyə çevirmək. O, ABŞ hökümətində zəif prezident olmasından istifadə etdi. Müxalif partiya lideri Tramp da Netanyahunun ideyaları ilə razılaşır və İsrail bundan istifadə edəcək. Amma, Netanyahu üçün ən böyük problem xaricədə yox, ölkənin daxilindədir. Fikrimcə, biz tarixin ən önəmli səhnələrindən birini yaşayırıq.”

Fərid