"Adama güllə atmağı da öyrətmək olar, general rütbəsi də vermək olar, amma ürək vermək olmaz" | Eurasia Diary - ednews.net

5 Avqust, Çərşənbə


"Adama güllə atmağı da öyrətmək olar, general rütbəsi də vermək olar, amma ürək vermək olmaz"

"Poladın valideynləri bilsin ki, şəhidlərimizin itkisi nəinki onları, bütün xalqı yandırır..."

Cəmiyyət A- A A+
"İndi də mətbuat vasitəsilə məlumatlar oxuyuram və P.Həşimov haqqında elə şeylər deyirlər ki, məəttəl qalıram. Hətta ona verilən mənzili şəhid ailəsinə bağışlayıb".
 
EDNews.net xəbər verir ki, bunu Moderator.az-a açıqlamasında yazıçı, millət vəkili Aqil Abbas deyib. O, general Polad Həşimovun şəhid olmasının hamımız üçün böyük itki olduğunu bildirib:
 
"General Polad Həşimovu tanımamışam, amma onun haqqında ilk dəfə 2016-cı il aprel döyüşlərində eşitdim. Sonra o, general rütbəsi alanda haqqında məlumatı oxudum. İndi də mətbuat vasitəsilə məlumatlar oxuyuram və P.Həşimov haqqında elə şeylər deyirlər ki, məəttəl qalıram. Hətta ona verilən mənzili şəhid ailəsinə bağışlayıb. Poladın Sumqayıtdakı mənzilini və eyvanını gördünüz. Bu adam həmişə əsgərlərinin içində olub. Şəkillərinə baxanda görürsən ki, əsgərləri ilə birlikdə səngərdə çörək yeyir. Əsgərləri də komandirlərini çox seviblər. Böyük bir itkidir. Bir generalı yetişdirmək üçün nə qədər vaxt lazımdır. Özü də əsl hərbçidən söhbət gedir. General var ki, heç döyüşdə olmayıb, onun vəzifəsi arxa cəbhədə olub və bunu başqa yerə yozmaq olmaz. Məsələn, Raquf Orucov kimi hərbçi yetişdirmək üçün bilirsiniz nə qədər vaxt lazımdır? Adama güllə atmağı da öyrətmək olar, general rütbəsi də vermək olar, amma ürək vermək olmaz. O ürəyi Allah verir, qanla gəlir. 
 
Bu günlərdə belə bir yazı yazmışdım və orda belə yer var idi ki, "döyüş başlasa, bir əli, ayağı, gözü olmayan qazilərimiz yenə ön cəbhədə olacaqlar, çünki insan təkcə əliylə, ayağıyla deyil, həm də ürəyi ilə döyüşür. Ona görə də bizim bu cür oğullarımızın ürəyi var. Şəhidlərimiz cənnətdə Allahın dərgahındadırlar. Sadəcə olaraq bu günə qədər Polad valideynlərinin oğlu idi, indi bütün xalqın övladına çevrildi, tarixə düşdü. Təbii ki, onun itkisi ata-anasını yandırır, amma onun valideynləri bilsin ki, şəhidlərimizin itkisi nəinki onları, bütün Azərbaycanı yandırır".

EDNews.net

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...