Bu gündən koronavirus əleyhinə 3-cü, yəni "buster" doza peyvənd vurdurmayan şəxslər restoran, mehmanxana və ticarət mərkəzlərində qapalı məkanlara buraxılmayacaqlar. Əsasən də bu insanlar keçirilən el şənliklərində, toylarda iştirak etmək hüququndan məhrum olurlar.
Maraqlıdır, vətəndaşlarımız 3-cü doza peyvənd vurdurublarmı?
Ednews bu səbəblə bir çox ictimai-siyasi xadimlərlə əlaqə saxlayaraq onlara sual ünvanlayıb.
Sorğuda iştirak edən müsahiblərimizin maraqlı cavablarını təqdim edirik:
Millət vəkili Sabir Rüstəmxanlı qaydalara əməl edənlərdəndir.
“Əlbəttə ki, 3-cü dozanı vurdurmuşam. Həkimlər immun sistemim güclü olduğu üçün 4-cü dozaya ehtiyacım olmadığını bildirdilər”.
Millət vəkili Vahid Əhmədov isə:
“3-cü doza üçün vaxtım tamam olmayıb, olanda vurduracam”.
Millət vəkili Arzu Nağıyev isə qeyd edib ki, nəinki 3-cü, hətta 4-cü dozanı da vurdurmaq fikri var.
“Mən 1 və 2 doza sinovak, 3 cü doza olaraq isə Pfazer vurdurmuşam. Əgər antitelim aşağı olsa, mart ayında 4- cü doza peyvənd vurdurmaq fikrim var”.
Demokratiya və İnsan Hüquqları Komitəsinin sədri Çingiz Qənizadə isə qeyd edib ki, elə yenicə vaksinasiyadan keçib.
“Ötən gün “Bakı Sağlamlıq Mərkəzində “buster” doza olaraq “Pfizer” vurdurdum. Əvvəl antitel analizi verdim. Daha sonra isə həkimlərin məsləhətilə 3-cü dəfə peyvənd olundum”.
AĞ Partiya başqanı Tural Abbaslı isə artıq vaksinasiya üçün qeydiyyatdan keçdiyini bildirib.
“”Buster” doza üçün qeydiyyatdan keçmişik, tezliklə mən də vaksinasiya olunacam”.
Azərbaycan Demokrat Partiyasının (ADP) sədri Sərdar Cəlaloğlu vurğulayıb ki, immunitet sertifikatı var.
”Hər iki dozanı vurdurmuşam. Xəstəlik keçirdiyim üçün, immunitet sertifikatım var. 3-cü dozanı hələ ki, vurdurmayacam".
Azərbaycan Xalq Partiyasının sədri Pənah Hüseyn isə vaksinasiya üçün qeydiyyatdan keçdiyini deyib.
“”Buster” doza üçün müddətim sabah tamam olur, ona görə də artıq qeydiyyatdan keçmişəm. Sabah, inşallah vaksinasiya etdirəcəm”.
Millət vəkili Azər Badamov isə əhalini bir nəfər kimi peyvənd olunmağa çağırıb.
“Vaksin olunmuşam və hər kəsə bunu tövsiyyə edirəm”.
Xalq yazıçı Çingiz Abdullayev isə…
“Mən ayda ən azı iki-üç dəfə xarici səfərlərdə oluram. Bu səbəbdən də artıq vaksinasiyadan keçmişəm".
Şair Vahid Əziz isə xəstəliyə görə ümumiyyətlə peyvənd olmadığını bildirib.
“Mənim güclü allergiyam var. Ona görə nə 1-ci, nə də 2-ci dozanı vurdurmuşam. Həm də bu yaxınlarda koronavirusa yoluxmuşdum”.
Xalq artisti Afaq Bəşirqızı da V.Əziz kimi səhhəti ilə bağlı peyvəndlənmədən keçmədiyini deyir.
“Səhhətimlə əlaqədar hələ ki, həkimlər mənə vaksinasiya olmağı tövsiyə etmirlər”.
Xalq artisti Faiq Ağayev də artıq 3-cü dəfə vaksinasiya olduğunu bildirib.
Əməkdar artist Bəhram Bağırzadə isə bu haqda ilk dəfə bizdən eşitdiyini qeyd edib:
“İlk dəfə ”Sinovac” daha sonra “Pfizer” preparatları ilə peyvənd olunmuşam. Açığı "buster” doza üçün tərtib olunan qadağalar barədə ilk dəfə sizdən eşidirəm. Əgər belə bir qərar varsa təbii ki, tez bir zamanda vaksinasiyadan keçəcəm. Bu xəstəliyə görə o dünyanı görüb gələn bir insanam”.
Musiqişünas Abbasqulu Nəcəfzadə də peyvənd vurduran məşhurlardandır.
Xalq artisti Cavan Zeynallı isə deyir ki, hazırda səhhətində problem var.
“1-ci və 2-ci dozaları vurdurmuşam. Lakin hazırda xəstəyəm, heç yerə çıxmıram, evdə müalicə olunuram”.
Xalq artisti Tünzalə Ağayeva isə bildirib ki, nəinki özü hətta bütün komandası 3-cü doza peyvənd olunub.
Əməkdar artist Abbas Bağırov isə deyib ki:
“3-cü doza vaksindən keçmişəm və İnşallah 4-cünü vurduracam”.
Qida Məhsulları Texnologiyaları Departamentinin rəhbəri Ağa Salamov isə indiyə qədər heç bir peyvən vurdurmadığını, hətta buna qarşı olduğunu deyib.
“Mən heç bir vaksin vurdurmamışam və onun əleyhinəyəm. Hesab edirəm ki, peyvənd olunmaqla koronavirusdan və ya hansısa ştammından yüzdə yüz sağalmaq və ya ona yoluxmamaq mümkün deyil. Vaksinasiya olunan, qrip kimi keçirir, yaşlı adamların halı dəyişir, çünki onları süni şəkildə yoluxdurub bədənlərində antikor əmələ gətirirlər. Mən qanımdakı “D” vitaminini yoxlatdırıb onun səviyyəsini qaldıraram, nəinki bilmədiyim vaksini vurdurmaq”.
Təhsil Nazirliyinin mətbuat katibi Cəsarət Valehov isə “buster” dozanı ötən il etdirdiyini vurğulayıb.
“Mən “buster” dozanı ötən ilin noyabr 11-də etdirmişəm”.
“Bakı Metropoliteni” QSC-nin mətbuat katibi Bəxtiyar Məmmədov da 3-cü dəfə vaksinasiya edənlərdəndir.
Gülnar Səlimova