Türkiyə Prezident Administrasiyasının Kommunikasiya İdarəsinin təşkilatçılığı ilə Adana şəhərində təşkil edilən “Türkiyənin NATO-ya üzvlüyünün 68-ci ildönümü: Strateji Alyansın güclü üzvü Türkiyə” adlı paneldə NATO əməliyyatlarına ən çox töhfə verən ilk 5 ölkədən biri olan Türkiyənin fəaliyyətləri, NATO-nun Türkiyəyə verdiyi töhfələr müzakirə edilib.
Ednews xəbər verir ki, paneldə çıxış edən NATO Parlament Assambleyasında Türkiyə nümayəndə heyətinin sədr əvəzi, Türkiyə Böyük Millət Məclisinin Xarici Əlaqələr Komitəsinin üzvü Əhməd Berat Çonkar Suriyada əməliyyat zamanı həyatını itirən şəhidlərə Allahdan rəhmət diləyərək Türkiyənin 68 illlik NATO-dakı mövqeyinin çox əhəmiyyətli və qiymətli olduğunu deyib.
Türkiyənin NATO əməliyyatlarına çox mühüm, bənzərsiz töhfələr verdiyini, həmçinin öz milli təhlükəsizliyi baxımından NATO-dan önəmli təcrübə və qazanclara sahib olduğunu ifadə edən Çonkar soyuq müharibə dövründə NATO-nun cənub və cənub-şərq qanadını müdafiə edən ölkə olaraq Türkiyəninüzərinə düşən vəzifəni layiqincə yerinə yetirdiyini xatırladıb.
O, Türkiyənin 90-cı illərdən bu yana ətrafındakı qeyri-sabitlik səbəbilə böyük bir atəş çəmbərindən keçdiyini vurğulayıb.
“Türkiyənin son zamanlar yaşadığı terrorla mübarizə məsələlərində, xüsusilə NATO daxilində Türkiyənin gözləntilərini tam mənasıyla dərk etməyən, bu nöqtədə də əslində Türkiyənin layiq olduğu dəstəyi ittifaq həmrəyliyi çərçivəsində göstərməkdə bir az zəif olan NATO ittifaqı mənzərəsi ilə qarşı qarşıya qaldıq. NATO təbii ki, problemsiz bir qurum deyil. Ancaq Türkiyənin mövqeyinə nəzər saldıqda Türkiyənin xüsusilə NATO-dan gözləntilərinin həm özünün milli təhlükəsizliyi baxımından çox kritik olduğunu, həm də Avropa və Atlantikanın təhlükəsizliyi baxımından da çox mühüm mövqedə olduğunu görürük. Bunun ən gözəl nümunəsi Suriyada baş verən hadisələr, bu gün orada yaşanan qeyri-sabitlik, münaqişələr, terror təşkilatlarının yaranması terrorla mübarizə məsələsində ortaq mövqenin formalaşmasını və ortaya çıxmasını zəruri etdi. Bu, İŞİD-ə qarşı baş verdi və NATO da xüsusilə koalisiya çərçivəsində lazımi addımları vaxtında atdı”, – deyə o bildirib.
Çonkar xüsusilə İŞİD ilə mübarizədə Türkiyənin meydanda mübarizə aparan yeganə NATO ölkəsi olduğuna diqqət çəkib. Belə ki, o,Türkiyənin baş ağrısı olan PKK terror təşkilatıyla, xüsusilə onların Suriya qolu olan YPG ilə bağlı eyni vaxtda apardığı mübarizədə qərb ictimaiyyətindən gözlədiyi dəstəyi görə bilmədiyindən təəssüf hissi keçirdiyini bildirib. Eyni zamanda Türkiyə ictimaiyyətinin haqlı olaraq NATO-nun yeri və zamanı gələndə haqlı olduğu hallarda və məsələlərdə Türkiyənin yanında möhkəm şəkildə dayanmasını gözlədiyini ifadə edib.
Türkiyənin son zamanlar Suriyada xüsusilə rejimin zülmü altında baş verən humanitar böhranı dayandırmaq və orada təhlükəsizliyi təmin etmək məqsədilə tamamilə beynəlxalq hüquq çərçivəsində əməliyyatlar həyata keçirdiyini xatırladan Çonkar NATO-nu 4-cü maddə çərçivəsində üzərinə düşən vəzifəni yerinə yetirməyə çağırıb.
"Ümid edirəm ki, NATO bu sınaqlardan doğru bir şəkildə keçəcək və Türkiyənin narahatlıqlarını doğru şəkildə dərk edərək lazımi addımları vaxtında atacaq”,-deyə Çonkar çıxışının sonunda vurğulayıb.
