Xəbər verildiyimiz kimi Goranboy rayonu Səfikürd kənd orta məktəbinin 6-ci sinif şagirdi məktəb direktoru tərəfindən psixoloji təzyiqə və təhqirə məruz qalıb. Məktəbin direktoru Lamiyə Abışova məktəbli ətəyinin yerinə şalvarla gələn şagirdi dərsdən kənarlaşdırıb.
Şagirdin atası Şəhruz Əsədovun sözlərinə görə, qızı məktəbli ətəyi yararsız hala düşdüyü üçün dərsə şalvarla getməli olub. Buna görə məktəb direktoru onun qızını sinif yoldaşlarının yanında aşağılayaraq, “yoxundur, get qonşudan al, ya da nənənin “ştanını” geyin” deyə cavab verib və onu dərsdən çıxararaq evə göndərdiyini bildirib. Fəhlə olaraq çalışan ata qızının növbəti gün də dərsə gedəndə direktor tərəfindən məktəbə buraxılmadığını deyib.
Goranboy Rayon Təhsil Şöbəsindən Ednews-a verilən açıqlamada məsələ ilə bağlı direktordan izahat alındığı və valideynin də yaxın saatda izahat verəcəyi qeyd olunub. Bildirilib ki, ilkin olaraq valideynlə əlaqə saxlayarkən o daha əvvəl səsləndirdiyi fikirləri təkzib edib. Valideyn həmin an əsəbi olduğunu və direktorun sadəcə “formada gəlsən yaxşıdır” dediyini bildirib.
Məktəbdə baş verən insidentlə bağlı Təhsil Nazirliyinin İctimaiyyətlə əlaqələr sektorunun müdiri Cəsarət Valehov Ednews-a açıqlaması zamanı məsələdən xəbərdar olduğunu, amma faktın hələ öz təsdiqini tapmadığını bildirib.
“Təhsil Nazirliyi məsələnin aydınlaşdırılması və bu barədə Nazirliyə məlumat verilməsi üçün yerli təhsil şöbəsinə tapşırıq verib. Bundan sonra məsələ daha düzgün təfsirini tapacaq”.
Cəsarət Valehov hər hansı bir şagirdin məktəbli geyiminə görə dərsdən qalmasına da münasibət bildirib:
“İstənilən halda şagirdi dərsdən kənarlaşdırılmaq olmaz”.
Gülnar Səlimova