Xəbər verdiyimiz kimi Goranboy rayonu Səfikürd kənd orta məktəbinin 6-ci sinif şagirdinin valideyni qızının məktəb direktoru tərəfindən psixoloji təzyiqə və təhqirə məruz qalmasını iddia edib.
Şagirdin atasının iddiasına görə, məktəbin direktoru Lamiyə Abışova məktəbli ətəyinin yerinə şalvarla gələn şagirdi dərsdən kənarlaşdırıb.
Lakin hadisədən bir müddət keçdikdən sonra şagirdin atası direktor haqqında səsləndirdiyi iddiaları təkzib edib.
Goranboy Rayon Təhsil Şöbəsindən Ednews-a verilən açıqlamada məsələ ilə bağlı direktor və valideyndən izahat alındığı bildirilib.
Direktor vəzifəsini icra edən Abışova Lamiyə Rövşən qızı izahatında bildirib ki, aprel ayının 15-dən şagirdlərə məktəbli formasında gəlmələri bildirilib. Onun sözlərinə görə, məktəbin şəraiti ilə əlaqədar qış aylarında şagirdlərə geyimlə bağlı hər hansı bir tapşırıq verilməyib.
“6-cı sinif şagirdi Əsədova Lalə Şəhruz qızı yenə məktəbə şalvarda gələrkən mənim və təşkilatçı müavin tərəfindən “məktəbə formada gəl” deyilib. Başqa artıq heç bir ifadə işlənməyib. Əsədova Lalənin atası məktəbə zəng vuraraq mənimlə əlaqə saxlayıb. O qızının heç vaxt forma geyinməyəcəyini kobud şəkildə bildirib, bizi bəzi orqanlar tərəfindən sıxışdıracağını deyib. Elə həmin gün Şəhruzun qohumu hazırda Bakı şəhərində yaşayan Abdullayev Elvin Gündüz oğlu məktəbə zəng vuraraq təşkilatçı müavinlə danışaraq Lalənin məktəbli forması geyinməsinə etirazını bildirib və hədə formasında “mənim sözümü direktora çatdırın” deyib. Məktəbdə mən və başqa işçilər nə şagirdlərin, nə də valideynlərin ünvanına artıq söz işlətməyiblər”.
İddiaçı tərəf 6-ci sinif şagirdi Lalə Əsədovanın atası Şəhruz Əsədov isə yazdığı izahatda 26-27 aprel tarixlərində qızının məktəbdə UBR-i Əhmədova Safura Elçin qızı və məktəbin direktoru Lamiyə Abışova tərəfindən şalvarda getdiyinə görə dərsə buraxılmadığını bildirib.
“UBR-i qızıma “məktəbli forman yoxdursa, get, qonşudan al!” deyib. Həmin gündən məktəbə getməyib. Bu gün də özünü nasaz hiss etdiyindən məktəbə getməyə qoymamışıq. Sabah qızımı məktəbə göndərəcəm”, - deyə, ata qeyd edib.
Goranboy Rayon Təhsil Şöbəsinin müdir əvəzi Kifayət Rzayeva isə açıqlaması zamanı bildirib ki, bu məsələdə direktorla yanaşı uşaq birliyi və sinif rəhbəri də günahkardır və onlardan heç olmasa biri bu məsələni tənzimləyə bilərdi.
"Bütün təhsil işçilərinin etik davranış qaydaları var və bu, çərçivəni aşmamalıdır. Məktəbin də özünün daxili intizam qaydalarına uyğun harada və necə qanun pozuntusu baş veribsə, günahkarlar cəzalanacaq. Heç kim cəzasız qalası deyil. Təhsildən uşağı yayındırmağa heç kimin səlahiyyəti çatmır. İstər direktor, istər müəllim və ya kim olursa olsun...”
Məlumata görə Təhsil Nazirliyinin Uşaq birliyi tərəfindən məktəbə göndərilən psixoloq rəyinə əsasən uşağın psixoloji dəstəyə və müalicəyə ehtiyacı var.
Gülnar Səlimova