“Bolt”-a qarşı etiraza qoşulan sürücülərin hesabları şirkət tərəfindən bloklanıb. Bu barədə taksi sürücüləri məlumat verib.
Qurum isə yayılan ittihamları təkzib edərək qeyd edib ki, hazırda qaydaları pozmayan sürücülər şirkət tərəfindən heç bir qadağaya məruz qalmayıb.
"Bolt" şirkəti ilə əməkdaşlıq edən taksi sürücüsü Nicat Məmmədov Ednews-a açıqlamasında bildirib ki, onun tanıdığı ən azı 15 nəfərin hesabı blok edilib.
O, daha öncə bu barədə sosial şəbəkələrdə məlumat da yayıb.
“Ortada bir çox problem var və bu həm sürücülərə, həm də müştərilərə mənfi təsir göstərir. Biz də bu problemlərin həlli istiqamətində etirazımızı bildiririk, amma bunlar problemi həll etmək əvəzinə, diktatorluq edirlər. Açıq-aşkar deyirlər ki, taksi sahəsində qanunsuzluqdur, özbaşınalıqdır və biz də bundan istədiyimiz kimi istifadə edirik”.
Şikayətçi həmçinin çətin vəziyyətdə olan sürücülərin problemlərini həlli üçün müştərək hərəkət etməyin vacibliyini də vurğulayıb.
“Etiraz aksiyasının təşkilatçısı kimi sürücülərə qarşı olan bu özbaşınalığa görə sürücülərin yaşadığı çarəsizliyi, maddi çətinlikləri ağır bir yük kimi öz üzərimdə hiss edirəm. Hüquqşünaslardan, media qurumlarından, aktivistlərdən xahiş edirəm bu məsələdə mənə köməklik etsinlər”.
Xatırladaq ki, "Bolt" şirkəti ilə əməkdaşlıq edən taksi sürücüləri mayın 27-də saat 17:00-dan 19:00-dək sifariş proqramın bağlayaraq şirkəti boykot ediblər. Onlar əsasən komissiya haqlarının 20%-dən 10%-ə endirilməsini, minimal qiymətin isə 2 manat 40 qəpikdən başlamasını tələb edirlər. Bundan əlavə sürücülər sifariş olunan ünvan və ödəniş üsulu haqqında əvvəlcədən onlara məlumat verilməsini istəyirlər.
Gülnar Səlimova