Bu ilin I yarısında İqtisadiyyat Nazirliyi yanında Əmlak Məsələləri Dövlət Xidməti fiziki və hüquqi şəxslərə 908 779 elektron xidmət göstərib.
Bu barədə Ednews-a nazirlikdən bildirilib.
Məlumata görə, bu, ötən ilin eyni dövrü ilə müqayisədə 30,4 % çoxdur.
46 elektron xidmətin 33-ü daşınmaz əmlakın qeydiyyatı və kadastrı, 10-u dövlət əmlakının özəlləşdirilməsi, 3-ü isə dövlət əmlakının idarə edilməsi və icarəsi il bağlıdır.
İstifadəçilərin böyük əksəriyyəti daşınmaz əmlakın qeydiyyatı ilə bağlı elektron xidmətlərə müraciət edir. Hesabat dövründə daşınmaz əmlakın qeydiyyatı üzrə elektron xidmətlərdən istifadə sayı 77 787 olub. Ən çox istifadə olunan elektron xidmət isə “Elektron çıxarışın yoxlanması”dır. Bu xidmətdən istifadə sayı 712 440-dır.
Bundan başqa əmlak idarəçiliyi sahəsində onlayn xidmətlər də bu sahədə rahatlığı və operativliyi əhəmiyyətli dərəcədə artırıb. Belə ki, vətəndaşlar daşınmaz əmlakın yüklülüyünə dair arayışı ("Forma-1") notariuslarda onlayn rejimdə əldə edirlər. Yanvar-iyun aylarında bu imkandan yararlananların sayı 100 861 olub.
Bu dövrdə qurumun digər fəaliyyət sahələri olan dövlət əmlakının özəlləşdirilməsi, idarə edilməsi və icarəsinə dair elektron xidmətlər üzrə 17 691 müraciət qəbul edilib.
Elektron xidmətlər sferasında mühüm yeniliklərdən biri İpoteka Kağızının Elektron Sisteminin tətbiqi olub. İyunun 16-dan daşınmaz əmlakın qeydiyyatı sahəsində fəaliyyətə başlayan sistemdən istifadə sayı 895 olub. Sistem daşınmaz əmlak üzərində ipoteka hüququnu təsbit edən ipoteka kağızının ipoteka qoyanlar tərəfindən tərtib edilməsi, həmin kağızın ipoteka saxlayanların adına qeydiyyata alınması, habelə ipoteka kağızına xitam verilməsi ilə bağlı müvafiq əməliyyatları elektron formada aparmağa imkan verir.