Hazırda dünyada meşə yanğınlarının sayı get-gedə artmaqdadır. Bu il ərzində Yunanıstan, Gürcüstan, Türkiyə, Cənubi Amerika ölkələri meşə yanğınları ilə mübarizə aparmalı olublar. Mütəxəssislər bildirir ki, 200 ildə dünya üzrə meşə ərazilərinin sahəsi 2 dəfədən çox azalıb.
Azərbaycanda da bu il yay aylarında müxtəlif rayon ərazilərində meşə yanğınları baş verib. Son günlərdə danışılan yanğın isə Zaqatalada baş verən meşə yanğını oldu.
Bəs yanğından sonra meşə massivlərində bərpa üçün hansə işlər görülür?
Ekologiya və Təbii Sərvətlər nazirliyinin mətbuat xidmətinin rəhbəri İradə İbrahimova Ednews-a verilən açıqlamada bildirilib ki, araşdırmalarımız başa çatmamış dəqiq məlumat verə bilməyəcəyik.
Meşələrin İnkişafı Xidmətinin rəisi Xalıqverdi Hüseynov yanğına məruz qalmış ərazilərin bərpası məqsədilə proqram hazırlanması barədə danışıb. O, proqramda yanğına məruz qalmış sahələrdə bərpa işlərinin ümumi istiqaməti müəyyənləşdiriləcəyini və görüləcək işlərin əksini tapacağını qeyd edib:
“Payız mövsümündə yanğına məruz qalmış ərazilərdə meşə bərpa tədbirlərinin həyata keçirilməsi məqsədilə xüsusi proqram hazırlanır və əsas istiqamətlər müəyyənləşdirilir. Yanğına məruz qalan sahələrin təmizlənərək bərpa üçün hazır vəziyyətə gətirilməsi, şumlama işlərinin aparılması, çalaların qazılması, mümkün olan yerlərdə suvarma arxlarının çəkilməsi, daha sonra hər bölgənin iqlim şəraitinə uyğun meşəcinsli ağacların əkilməsi, toxumların səpilməsi nəzərdə tutulub”.
Hazırda demək olar bütün ölkələr həm də iqlim böhranının müxtəlif nəticələri ilə mübarizə aparır. Bu özünü daha çox quraqlıq və su qıtlığı ilə göstərir. Hazırda yanğınların bu qədər ərazilərdə yayılmasına səbəb iqlim dəyişikliyi də ola bilərmi?
Bununla bağlı iqlimşünas Məhərrəm Mehdiyev Ednews-a açıqlamasında bildirib ki, yanğınlar zamanı buraxılan karbon qazı iqlim dəyişiminə mütləq təsir edir.
“Əgər ağaclar yanırsa onun tullantısını sıfır sayırıq. Amma əgər bərpa etmək mümkün olmursa onu sıfır saymaq mümkün deyil. Hər bir ərazilər yenidən bərpa olunmalıdır. Biz karbon qazının azaldılmasını, insan cəmiyyəti üçün oksigenin artırılmasını istəyiriksə yaşıllıqların artması üçün çalışmalıyıq. Oksigenin azalması digər xəstəliklərin yaranması üçün başlıca səbəblərdən biridir. Belə davam edərsə, gələcək nəsillər üçün bu vəziyyət heç də ürək açan olmayacaq. Bunun qarşısını almaq üçün isə birlikdə mübarizə aparmaq lazımdır”.
Ayan
