Bakı Ağır Cinayətlər Məhkəməsində "Baku Steel Company" şirkətinin sabiq rəhbəri Rasim Məmmədovun cinayət işi ilə bağlı məhkəmə prosesi keçirilib.
Ednews Trend-ə istinadən xəbər verir ki, prosesdə ifadə verən "Baku Steel Company"nin hazır məhsullar anbarının rəisi Fərhad Həsənov şirkətdən 42 min ton alüminiumun yoxa çıxması ilə bağlı Dövlət Təhlükəsizliyi Xidmətinə ərizə ilə müraciət etməsindən danışıb.
Bildirib ki, yoxa çıxan 42 min ton metalı qəbul edib və satış anbarına yönəldib: "Rasim Məmmədov sonrakı məsələlərin mənə aid olmadığını dedi. Mənim işim metalı qəbul edib, satış anbarına göndərməkdir. Oradan da tikinti şirkətlərinə satış həyata keçirilirdi. Mən öz anbarıma cavabdehəm".
F.Həsənovun ifadəsində ziddiyyət olduğundan onun ibtidai istintaqa verdiyi ifadəsi elan olunub. Fərhad Həsənov əvvəlki ifadəsində 2016-2020-ci illər ərzində şirkətdə 1 milyon 193 min ton armatur istehsal olunduğunu deyib.
Prokuror Orxan Səmədov bu hissə ilə bağlı məsələyə aydınlıq gətirməsini istəyib. Şahid istintaqa verdiyi ifadəsini təkzib edib. Bildirib ki, 1 milyon 193 min ton alüminium 4 ilə deyil, 10 ilə istehsal olunub.
İttihama görə, Rasim Məmmədov "Baku Steel Company" MMC-nin müşahidə şurasının sədri olduğu müddətdə vəzifə səlahiyyətlərindən sui-istifadə edib, sənədlərə yalan məlumatlar daxil etməkdə, o cümlədən, rəqəmləri şişirtməkdə, başqa şəxslərin adına şirkətlər yaradıb şirkətin mallarını aşağı qiymətlərlə satmaqda, "Baku Steel Company"-nin məhsullarını öz obyekt və yaşayış binalarına sərf etməkdə təqsirləndirilir. Bütün bunlarla təqsirləndirilən şəxs ümumilikdə təxminən 55 milyon manatlıq mənimsəmə və israfetməyə yol verib.
Göstərilən cinayət əməllərinə görə, Rasim Məmmədova Cinayət Məcəlləsinin 179.4 (mənimsəmə və ya israfetmə, xüsusilə külli miqdarda ziyan vurmaqla törədildikdə), 193.3.2 (xüsusilə külli miqdarda gəlir əldə etməklə yalan sahibkarlıq), 308.2 (vəzifə səlahiyyətlərindən sui-istifadə emə, ağır nəticələrə səbəb olduqda) və 313-cü (vəzifə saxtakarlığı) yekun ittiham verilib.
