Daşınmaz əmlakın alqı-satqısı, qeydiyyatı ilə bağlı prosedurlar sadələşəcək və əlavə xərclər azaldılacaq. Bu isə evlərinin qeydiyyat sənədini almağı daha da asanlaşdıracaq.
Məsələ ilə bağlı daha ətraflı danışan əmlak məsələləri üzrə ekspert Elnur Azadov Ednews-a açıqlamasında bildirib ki, bu qanunla əmlak qeydiyyatı proseduru daha da sadələşəcək.
“Əmlakın qeydiyyatı ilə bağlı əvvəl 4 prosedurun həyata keçirilməsi üçün bir həftə vaxt lazım idisə, yenilənən tətbiqdən sonra bir gün ərzində bunu reallaşdırmaq mümkün olacaq. Bununla bağlı Ədliyyə nazirliyi ilə Əmlak məsələləri üzrə dövlət xidməti tərəfindən müəyyən təbdirlər planı hazırlanıb. Hazırda əmlak çıxarışlarının elektron formada istifadəsi artıq mümkündür. Dünyanın istənilən yerindən vətəndaş sistemə daxil olub, öz çıxarışı ilə bağlı əmaliyyat apara bilər”.
Ekspert prosesin hansı mərhələdən keçməsini daha dəqiq izah edib.
“Bu zaman vətəndaş notariat ofisinə bir dəfə müraciət edəcək. Notarius əmlak hüquqlarını qeydiyyata alınması ilə bağlı ərizəni özü sistemdə qeydiyyatdan keçirəcək. Sistemdə həmin ərizə emal olunacaq və əmlak hüquqları ilə bağlı sənədi əldə edəcək”.
Ekspert həmçinin onu da qeyd etdi ki, texniki pasportların da elektron formada verilməsi mümkün olacaq. Onun sözlərinə görə alqı-satqı işləri də bu portal üzərindən vətəndaşların ixtiyarına buraxılacaq. Bu da vətəndaş və məmur arasında olan işi demək olar ki, sıfıra endirəcək.
“Bunun üstün cəhəti vətəndaşlar sərbəst şəkildə çıxarış alıb qeydiyyata düşəcəklər. Yaşayış yerində qeydiyyatda olmadıqda bir sıra probelemlər yaranır. Bu zaman vətəndaşlar səsvermə hüquqlarından, tibbi xidmətlərdən ərazi üzrə istifadə edə bilmirlər.
Yenilik bir pəncərə prinsipi əsasında dövlət qeydiyyatı, daşınmaz əmlakın bölgü planlarını, ər-arvadın ümumi əmlakdakı paya dair şəhadətnamələri və digər sənədləri əhatə edəcək”.
Aynurə İsmayılqızı
