Bu gün - 2 fevral Azərbaycanda gənclər günüdür.  Bizim gənclər bu günü 1997-ci ildən bayram kimi qeyd edir. Ümumrespublika Gənclər Günü həmin il Prezident Heydər Əliyevin sərəncamı ilə təsdiq olunub.

Ednews özəl günlə bağlı deputatlar arasında sorğu keçirib. Azərbaycan gəncliyi bu gün hansı səviyyədədir? Dövlətin apardığı gənclər siyasətində onlar hansı rolu oynayırlar? 

Sorğunun cavablarını təqdim edirik:

Deputat Aqil Abbas:

“Həmişə də çalışmışam ki, gəncləri ətrafımda görüm. Onlara mümkün köməyi etməyə çalışmışam, qəzetimdə, saytımda iş vermişəm. İstedadlı gəncliyimiz var. Söhbət təkcə, ədəbiyyatdan, musiqidən, mədəniyyətdən getmir. Elmdə, texnikada da istedadlı, qabiliyyətli gənclərimiz var. Gənclərdən narazı deyiləm. Gənclərin deyirlər, səhvləri olur. Gənc elə səhv etməzsə gənc olmaz. Gənclərə məsləhətim odur ki, oxusunlar, oxusunlar, yenə də oxusunlar.

Deputat Məlahət İbrahimqızı:

“Azərbaycan gəncliyi demək olar, mütləq əksəriyyəti milli ordumuzun və 44 günlük Vətən müharibəsində döyüşənlərin, Qarabağın işğal altında olan torpaqlarını azad edən, Şuşanı fəth edən gənclərdir. Şəhidlərimizin, qazilərimizin əksəriyyəti gənclərdir. Kimin haqqı var ki, Azərbaycan gəncliyindən razı olmasın?! Allah gənclərimizi qorusun! Gənclərimiz qəhrəmanlıq göstərib şəhid olmasınlar daha. Allah onlara dövlətin sülh quruculuğunun inkişafında, rifahında, güclənməsində, Azərbaycanın dünyada, beynəlxalq aləmdə nüfuzunun qaldırılmasında qəhrəmanlıqlar qismət etsin. Bütün Azərbaycan gəncliyini təbrik edirəm. Dövlətimizin apardığı gənclər siyasətinin nəticəsidir ki, gözəl gənclik yetişir. Mükəmməl, qəhrəman gəncliyimiz formalaşdı”. 

Deputat Tahir Rzayev:

“Onlar bizim gələcəyimizdir. Ulu öndərimiz Heydər Əliyev bu fikri dəfələrlə səsləndirib. Xüsusən, İkinci Qarabağ müharibəsində gənclik göstərdi ki, onlar vətəni, torpağı müdafiə etməyə, torpaq uğrundan canından keçməyə hazırdılar. Ordumuza xidmət edən zabitlərimiz, əsgərlərimiz o şücaətləri Azərbaycan gəncliyinin bir simvolu, dünyaya səs salan hünəri oldu. Ona görə də gənclərimizin fəaliyyətindən qürur duymalıyıq. Onların bu gün əldə etdikləri, qazandıqları gələcək nəsil üçün örnək olmalıdır. Zəfər Günü ilə bağlı rayonlara səfərim oldu. Orada şəhid ailələrini, qazilərimizi ziyarət etdik. Gənclərin necə vətənpərvər ruhda olduqlarını müşahidə etdim, qürur duydum. Onların hünərləri Azərbaycan xalqına yeni tarix bəxş etdi.

Azərbaycan gəncliyi dünyaya çıxmalıdır. Bizim mədəniyyətimizi, elmimizi, hünərlərimizi dünyaya çatdırmalıdırlar. Onlara xoş həyat, ailə arzu edirəm”.

Oğuz Ayvaz

• Tag:
• Azərbaycan gəncliyi