Xəbər verdiyimiz kimi, DYP yararsız avtomobillərlə sərnişin daşıma fəaliyyəti ilə məşğul olan sürücülərə qarşı nəzarət-profilaktik tədbirlər həyata keçirir.
Tədbir zamanı marşrut xətti üzrə hərəkətdə olan bir çox nəqliyyat vasitəsinin yararsız halda olması və sərnişin təhlükəsizliyi üçün lazımı avadanlıqlarının olmaması müəyyən edilib, həmin sürücülər barəsində qanuna müvafiq tədbirlər görülüb.
Maraqlıdır ki, həqiqətən də istismar müddətini başa vurmuş avtomobillər yol-nəqliyyat hadisələrinin yaranmasına səbəb olurmu?
Məsələ ilə bağlı Ednews-a açıqlamasında nəqliyyat eksperti Elməddin Muradlı bildirib ki, yol-nəqliyyat hadisələrinin baş verməsində istismar müddəti bitmiş avtomobillərin rolu böyükdür.
“Bəs nə üçün yol nəqliyyat hadisəsi baş verəndə avto-texniki tibbi ekspertiza təyin olunur? Bu ekspertizanın təyin olunmasına səbəb avtomobilin texniki parametrləri araşdırılıb, hansı səviyyədə olduğu üzə çıxsın. İlk növbədə əyləc sisteminə baxılsın. Avtomobilin saz vəziyyətdə saxlanılması üçün sürücülərin üzərinə qoyulan məsuliyyətin bir formasıdır”.
Ekspert həmçinin sürücülərin bu barədə laqeydsiz yanaşmalarından da danışıb.
“Bəzi sürücülər elə bilir ki, əgər avtomobilin dörd təkəri hərəkət edirsə deməli onu sürmək olar. Texniki parametrlərlə bağlı bir sıra qaydalar var. Hər birimiz də bu qanunlara bir sürücü kimi əməl etməliyik. Bu da ondan ibarətdir ki, biz avtomobili vaxtında yoxlatdırmalı və texniki tələbləri yerinə yetirməliyik. Əgər avtomobil istismar müddətini başa vurubsa bunu normal şəkildə aparıb çıxdaş etdirməliyik”.
E.Muradlı bildirib ki, dünyanın bir çox ölkələrində bu problem mövcuddur.
“Təkcə Azərbaycanda yox, bir çox cəmiyyətlərdə maşın gərək yana, dənizə düşə, parçalana ki, sahibi ondan əl çəksin. Bizdə bu cür insanların sayı çoxdur. Bu insanlar başa düşünmür ki mən ətraf mühitə nə dərəcə ağır ziyan vururam. Hər şeydən əvvəl insanlar bu avtomobilləri istifadə etməklə ölümlə üz-üzə olmaqlarını fikirləşməlidirlər”.
Ekspert qeyd edir ki, kimi dindirsən deyər, maşın mənim “çörək ağacım”dır.
“Bir də baxırsan ki, o “çörək ağacı” sürücünü dəmir barmaqlıqlara aparır. Bu avtomobillərin varlığı gec-tez kiminsə ölümünə səbəb olacaq. Belə yanaşmaların qarşısını almaq üçün istər Dövlət Yol Polisi, istər digər qurumlar ayda-ildə bir dəfə bu tədbiri aparmamalıdırlar. Belə ciddi tədbirlər davamlı baş tutmalıdır. Daim insanlar arasında maarifləndirici tədbirlər aparılmalıdır. Cəmiyyət başa düşməlidir ki, əlində od parçası aparmaq necə təhlükəlidirsə istismar müddəti bitmiş avtomobili sürmək də o dərəcə qorxuludur.”
Ayan Rzayeva
