Kür çayında suyun səviyyəsi aşağı düşüb. Suyun miqdarı o qədər azalıb ki, ərazidə olan geomüxtəliflik məhv olmaq təhlükəsi ilə üz-üzə qalıb. Ölkə ərazisində yağıntıların düşməsinə baxmayaraq, çayın  səviyyəsinin azalması müşahidə edilir. Bu proses saha çox Neftçala və Salyanda özünü qabarıq göstərir. Bu ərazidə demək olar ki, Kür tamamilə quruyub.

Kür çayının suyunun artımı və azalması rayonlardakı su probleminin həllinə nə dərəcədə təsir göstərir?

Ekoloq, professor Rauf Sultanov Ednews-a açıqlamasında bildirdi ki, uzun müddətdi Kür çayında suyun səviyyəsi aşağı düşüb. Bu da olduqca narahatlıq doğuran səbəblərdən biridir. Yay dövründə suyun azalmasını normal qarşılamaq olar. Bu təbii qanunauyğunluqdur: 

“Bu il daha çox azalma müşahidə olunub. Digər dövlətlərin Kür çayından istifadə etməsi də suyun azalmasına və ya artımına öz təsirini göstərir. Təbii iqlim şəraiti illər ərzində dəyişir. Fəsillərin dəyişməsiylə suyun artıb-azalma dövranı da dəyişir. Azərbaycanda şirin su ehtiyyatlarının formalaşmasının 3-də 2 hissəsi trans sərhəd ölkələrdən asılıdır. Buna görə də suyun azalması təkcə Azərbaycanda yox Türkiyə və Gürcüstandakı təbii iqlim şəritindan asılı olur”.

Həmçinin o qeyd edib ki, Azərbaycan dünya miqyasında şirin su ehtiyyatına görə ən aşağı səviyyədə olan ölkələr sırasındadır. 

“Keçmiş illərə nəzər salsaq, görərik ki, Mingəçevir su anbarına çoxsululuq dövrlərində daxil olan su həcmi 15-16 mlrd. kbm, azsululuq illərində 8-9 mlrd. kbm olsa da, son illərdə bu göstərici 6-7 mlrd. kbm-ə qədər azalıb. Verilən proqnoz məlumatlara əsasən, ölkə üzrə su ehtiyatlarının 2020-2050-ci illərdə 20-25 % azalması gözlənilir. Bütün bu qeyd olunanları nəzərə alsaq su ehtiyatlarından qənaətlə və səmərəli istifadə olunmasına, onların qorunmasına və mühafizə edilməsinə böyük ehtiyac var. Azərbaycan su ehtiyacının 70 faizini Kür və Araz çayların hesabına ödəyir”.

Vəfa Ustayeva