Mina təhlükəsi ilə mübarizə proqramı çərçivəsində dünyanın aparıcı təşkilatlarından olan “Sülhün Kökləri” (Roots of Peace) beynəlxalq humanitar təşkilatının təsisçisi və rəhbəri Heidi Kühn Azərbaycan Respublikasının Minatəmizləmə Agentliyinin (ANAMA) və Beynəlxalq Avrasiya Mətbuat Fondunun (BAMF) təşkilatçılığı ilə 9-13 may tarixlərində Azərbaycanda səfərdə olub.
Azərbaycana ikinci dəfə səfər edən Heidi Kuhnun səfərinin məqsədi ölkəmizin işğaldan azad edilmiş ərazilərində mövcud mina probleminin miqyası, bu problemin Böyük Qayıdışa və regionda sabitlik, davamlı sülhə yaratdığı maneələrin dünya ictimaiyyətinin diqqətinə çatdırmaq, “Minalardan üzümlüklərə” devizi altında minalarla çirklənmiş ərazilərin əkin sahələrinə çevrilməsinə dəstək göstərmək, eləcə də Beynəlxalq Analar Günü münasibətilə azərbaycanlı analarla birlikdə mina problemi ilə bağlı dünya qadınlarına qlobal müraciət etmək idi.
Səfərin ilk günündə - mayın 9-da Heidi Kuhn Azərbaycan Respublikası Minatəmizləmə Agentliyinin İdarə Heyətinin sədri Vüqar Süleymanov, BAMF-ın prezidenti Umud Mirzəyev və Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəliyinin Baş məsləhətçisi Eldar Seyidovun müşayiəti ilə Füzuli rayonunun işğaldan azad olunmuş, dağıdılmış və minalarla çirkləndirilmiş ərazilərinə səfər edib. İşğaldan azad edilmiş ərazilərində düşmən tərəfindən törədilən dağıntılar, bu ərazilərdə aparılan genişmiqyaslı humanitar minatəmizləmə fəaliyyəti, keçmiş məcburi köçkünlərin öz torpaqlarına qayıtması üçün icra edilən yenidənqurma və infrastruktur layihələri ilə tanış olan xanım Kuhn daha sonra minatəmizləmə əməliyyatları aparılan ərazidə 6 ədəd tank əleyhinə minanın partladılmasında iştirak edib.
Minaaxtaran heyət ilə görüşdən sonra Füzuli rayonu, Aşağı Əbdürrahmanlı kəndində Heidi Kuhnün, Beynəlxalq Avrasiya Mətbuat Fondunun Himayəçilik şurasının üzvü Aysəba Mirzəyevanın və sözügedən kəndin yerli qadınlarının, Qarabağın ətraf kəndlərinin, 8 nəfər mina qurbanının ailə üzvlərinin və məcburi köçkünlərin iştirakı ilə dünya qadınlarına birgə bəyanat səsləndirilib. Aşağı Əbdürrahmanlı kəndində keçirilən görüşdə iki dildə səsləndirilən bəyanatı ümumilikdə 47 nəfər qadın imzalayıb. Bəyanatı imzalayanlar ümid edirlər ki, dünya qadınları, anaları bəşəri mina probleminin həll olmasında onların müraciətinə səssiz qalmayacaq və dəstək olacaqlar. Heidi Kuhn həmçinin, Füzuli rayonunda yerləşən ANAMA-nın Horadiz bazasında və Aşağı Əbdürrahmanlı kəndində “Sülhün Kökləri” ağacəkmə kampaniyasını da həyata keçirib.
Mayın 10-da Heidi Kuhn ANAMA və BAMF rəhbərliyi ilə birlikdə Ümumilli lider Heydər Əliyevin 100 illiyi münasibətilə məzarını ziyarət edib və əziz xatirəsini ehtiramla anıb. Ziyarətdən sonra Heidi Kuhn bu mötəbər gün ilə əlaqədar ANAMA-nın ağacəkmə kampaniyasına qoşulub və oradan dünyaya qlobal mesaj verib. Heidi Kuhn BAMF prezidenti Umud Mirzəyev ilə birlikdə bu il aprelin 26-da Suqovuşanda mina partlayışı nəticəsində bir ayağını itirmiş BAMF-ın əməkdaşı Xəzər Babaşovu xəstəxanada ziyarət edib, ona şəfalarını çatdırıb.
Mayın 11-də ABŞ Dövlət Departamentinin Milli Elmlər Akademiyasından canlı yayımlanan "Ümumdünya Ərzaq Mükafatı Laureatı 2023" nominasiyası üzrə qalibin adının açıqlanması mərasimi nominantlardan biri olan Heidi Kuhn Bakı Nobel Klubunda ANAMA və BAMF rəhbərliyinin, milllət vəkillərinin, beynəlxalq təşkilatlarının nümayəndələrinin və dəyərli qonaqların iştirakı ilə birgə izlədi. 2023-cü il üzrə bu önəmli mükafatın qalibi elan olunan Heidi Kuhnün adını ABŞ Dövlət Depatamentinin katibi Entoni Blinken açıqladı və onun hazırda öz missiyasına Azərbaycanda davam etdiyini vurğuladı.
Mayın 12-də Bakı Ali Neft Məktəbinin (BANM) inzibati binasında Heidi Kuhn Heidi Kühnün mina təhlükəsinə həsr etdiyi, BAMF tərəfindən Azərbaycan dilinə təcümə edilən və çap edilən “Canlanan Torpaq” (Breaking Ground) kitabının təqdimat mərasimi keçirilib.
Xanımın özünün də iştirak etdiyi tədbirdə Azərbaycan Respublikasının Minatəmizləmə Agentliyinin İdarə Heyətinin sədri Vüqar Süleymanov, BAMF-ın prezidenti Umud Mirzəyev, Bakı Ali Neft Məktəbinin rektoru Elmar Qasımov, eləcə də ANAMA yanında İctimai Şura üzvləri və BANM-in tələbələri iştirak edib. Daha sonra universitetin həyətində analoji “Sülhün Kökləri” ağacəkmə kampaniyası reallaşıb.
Həmçinin, xüsusilı qeyd olunmalıdır ki, Heidi Kuhnün səfər çərçivəsində Azərbaycan Respublikası Xarici İşlər Naziri Ceyhun Bayramov, Azərbaycan Respublikasının Prezidentinin Köməkçisi, Azərbaycan Respublikası Prezidentinin Adminstrasiyasının xarici siyasət məsələləri şöbəsinin müdiri Hikmət Hacıyev və Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəsi Emin Hüseynovla da rəsmi görüşləri baş tutub.
Mayın 13-də Heidi Kuhnün Azərbaycan səfəri yekunlaşıb və o vətəni ABŞ-a geri dönüb.