Günümüzdə silah anlamı hərbi təchizatlardan savayı, həm də insanların psixoloji və mənəvi vəziyyətinə təsir edən amillərdir ki, bunun ən böyük nümunəsi sosial media şəbəkələridir.
Məsələ ilə bağlı Ednews-a danışan sosialoq Aynur Hacızadə sosial media şəbəkələrinin yaşadığımız zamana uyğun bir silah kimi istifadə edilə biləcəyini qeyd etdi.
"Yaşadığımız əsrdə sosial media həyatımızın mərkəzindədir. Buna görə də, gündəlik həyatımız təbii ki, istifadə etdiyimiz müvafiq şəbəkələrdən təsirlənir. Bu halda sosial media bəzi qüvvələr tərəfindən xüsusi maraqlara xidmət etmək üçün istifadə edilir. Doğrudur ki, müasir zamanda silah anlayışı təkcə hərbi deyil, həm də insanlara psixoloji cəhətdən zərər vermək baxımından inkişaf etmişdir. Bu sahə üzrə təbii ki, ən qabaqcıl vasitə sosial mediadır. Əvvala ona görə ki, bu texnologiyanın heç limiti yoxdur və bu üzrə tam nəzarət qeyri-mümkündür. Bildiyimiz kimi, qloballaşmadan sonra demək olar ki, bütün dünya ölkələrinin əhalisi sosial media ilə günə başlayır və günü bitirir. Artıq televiziya və ya radio özünün təlabatını əhəmiyyətli dərəcədə itirmişdir. Əvəzində bir-birindən fərqli şəkildə fəaliyyət göstərən media platformları mövcuddur ki, onlar hər gün xeyli sayda məlumat ötürürlər. Həddən artıq informasiyanın yayımlanması insanların zehninə təsir etmək üçün sosial medianı ən məqsədəuyğun vasitə edir".
Sosialoq günümüzdə sosial media insanlara, əsasən də gənclərə necə təsir göstərir sualına insanların gənc yaşlarından sosial media ilə tanış etdirilməsinin zəruri olduğunu bildirdi:
"Gənclərin sosial mediadan istifadəsi olduqca həssas bir mövzudur. Mediadan ən çox gənclər təsirləndiyi üçün bu barədə onu deyə bilərəm ki, valideyn nəzarəti kişik yaşlardan öz sözünü deməlidir. Bir çoxlarının fikrincə uşaqların “smartfon”lardardan, eləcə də sosial mediadan istifadəsinə qadağa qoymaq onlar üçün xeyirlidir. Lakin, bu fikir praktikada özünü doğrultmur. Ona görə ki, hər bir insan doğulduğu andan etibarən yaşadığı mühitə öyrəşməli və onun bir parçası olmalıdır. Praktika onu göstərir ki, erkən yaşlardan gəncləri sosial media və müasir texnologiyalar ilə tanış olmasına şərait yaratmaq lazımdır. Əks təqdirdə gənclər nisbətən böyüyüb formalaşdırdıqdan sonra bu kimi texnologiyalardan istifadənin limitini də gec kəşf edirlər. Bu sonradan onların qeyri-məhdud sayda və səmərəsiz şəkildə istifadəçiyə çevrilməsinə gətirib çıxarır".
Hər gün yeni trendlərin yaranmasının, gənclərin hər dəfə yeni axımlara vaxt ayırmasının onlarda diqqət pozuntusu yaratdığını deyən sosialoq məsələyə psixoloji aspektən yanaşdı.
Ekspert vurğuladı ki, günümüzdə sosial media şəbəkələrində tez-tez fərqli axımlar və trendlər ortaya çıxır:
"Bütün bunlar gəncləri cəzb edir və sürətlə onların həyatlarının bir parçasına çevrilir. Lakin, belə bir məqam da var ki, gənclər psixoloji olaraq daha davamsız olurlar. Beləliklə, qısa zaman ərzində məzmunundan asılı olamayaraq qısa zaman ərzində məşhurlaşan – trend halına gələn mövzuların yaranması gənclərdə diqqət pozuntusu yaradır. Azyaşlıların tez-tez yeni trendlərin bir parçası olması onların əhval ruhiyyəsinə mənfi təsir göstərə blir. Bunu da qeyd edim ki, trednlərə bir vaxtdan sonra marağın azalması gənc insanlarda mənəvi boşluq hissi yaradır. Əlavə olaraq, bu tendensiyaya qoşula bilməyən gənclər özlərini tənha hiss edirlər. Nəticə etibarilə deyə bilərəm ki, sosial media bir çox məqsədlər üçün istifadə edilə bilər. Burada əsas məsələ insanların yeni texnologiyalardan idarəli şəkildə istifadə edə bilmək qabiliyyətlərini inkişaf etdirməsi və gənclərin bu sahədə balanslı şəkildə yönləndirilməsidir".
Fərid Axund
